ხიდიდან გადავარდნილი მამაკაცის მდგომარეობა მძიმეა

ცხრა აპრილის ქუჩაზე, ხიდიდან გადავარდნილი მამაკაცის მდგომარეობის შესახებ ექიმებმა ოფიციალური კომენტარი არ გააკეთეს. თუმცა პირად საუბრებში ამბობენ, რომ დაშავებულს თავისა და გულმკერდის არეში მოტეხილობები აქვს, რაც სიცოცხლისთვის საშიშია.

„შეიძლება ითქვას, რომ მდგომარეობა მძიმეა. შესაბამისი მკურნალობა უტარდება და რა იქნება არ ვიცით“, - ამბობენ კლინიკა „იმედში“.

ცხრა აპრილის ქუჩაზე შემთხვევა დღეს, 18 ოქტომბერს, დაახლოებით 16:30 საათზე მოხდა. როგორც თვითმხილველები ყვებიან, ნასვამ მდგომარეობაში ხიდზე ორი მამაკაცი გადადიოდა, ერთ-ერთი მათგანი მოაჯირს მიეყრდნო და მდინარის ნაპირას ჩავარდა.

„სოფელ აგარიდან არიან, გასვენებიდან მოდიოდნენ და ხიდზე გაჩერებულან, ეტყობა ფეხი დაუსრიალდა, თავი ვეღარ შეიკავა და ჩავარდა“, - გვითხრა ერთ–ერთმა თვითმხილველმა.

დაშავებული მამაკაცი სასწრაფო-სამედიცინო დახმარების ბრიგადამ კლინიკა „იმედში“ გადაიყვანა.

შინაგან საქმეთა სამინისტროში, აღნიშნულზე მოკვლევა სისხლის სამართლის კოდექსის 115-ე მუხლით მიმდინარეობს, რაც თვითმკვლელობამდე მიყვანას გულისხმობს.

[ლუბა გიორგაძე, ახალციხე]