EMC: ‘ძალადობრივმა პოლიტიკამ შეიძლება სერიოზულ კრიზისამდე მიგვიყვანოს’

„ადამიანის უფლებების სწავლებისა და მონიტორინგის ცენტრის“ წარმომადგენელი თამთა მიქელაძე მოხეში მიმდინარე მოვლენებს პირადი ფეისბუქის გვერდზე ვრცელი სტატუსით ეხმაურება. მისი თქმით, მუსლიმების მხრიდან ამ უკმაყოფილებას სისტემური მიზეზი აქვს, თუმცა შენობასთან დაკავშირებულ დავაში მნიშვნელოვანია რამდენიმე გარემოების აღნიშვნა:„მოხის კომისია, რომელიც 2 წელზე მეტი ხანია არსებობს აბსოლუტურად არაეფექტური და ილუზორული ინსტრუმენტია შექმნილი დავის გადასაწყვეტად. თავდაპირველად კომისია შეიქმნა სადავოდ გამხდარი შენობის ისტორიული და კონფესიური წარმომავლობის დასადგენად, თუმცა,ძალიან მალე რელიგიის საკითხთა სახელმწიფო სააგენტომ მისივე დაარსებული კომისიის მიზანი შეცვალა და მას მხარეებს შორის დაძაბულობის დეესკალაციის მიზანი დაუსახა. შესაბამისად, ამ დრომდე შენობის წარმომავლობის დადგენის მიზნით არც ერთი ღონისძიება არ ჩატარებულა“.

მისი თქმით, რეალურად მოხეში, მანამდე ჭელასა და ასევე ადიგენში მიმდინარე პროცესები ადგილობრივი სამღვდელოების აგრესიული პოლიტიკის და სახელმწიფოს აშკარად არასეკულარული და ძალადობრივად ქცეული პოლიტიკის შედეგია და ეს პროცესი სერიოზულ კრიზისამდე შეიძლება მივიდეს.

„მოხის კომისიის შექმნის მიზანი რელიგიის საკითხთა სახელმწიფო სააგენტოს მხრიდან პრობლემის გადაწყვეტის გაჭიანურება იყო და დღეს სააგენტოს უსამართლო და არაეფექტურ პოლიტიკას რეალური უკმაყოფილებები ამხელს და უხეში კონტროლისა და ჩარევის პოლიტიკის უშედეგობაც კარგად ჩანს“, – აცხადებს მიქელაძე და ამატებს – „პოლიციის ჯგუფების მიერ შენობის ამოქოლვისა და გამაფრთხილებელი ნიშნების შემდეგ მუსლიმები მათ ისტორიულ შენობაში ლოცვას ალბათ პარტიზანულადაც აღარ წაიკითხავენ, მაგრამ მშვიდობიან თემში სახელმწიფოს უკვე მეორე რეპრესიული შეღწევა, სოციალურ უკმაყოფილებას კიდევ უფრო გაზრდის“.

შეგახსენებთ, მოხეში, რელიგიური კონფლიქტიდან ორი წლის თავზე, მოხეში, სადავო შენობაში მუსლიმებმა ლოცვა ისე დაიწყეს, რომ ჯერ შენობის საკითხი გადაჭრილი არ არის. ოთხდღიანი ლოცვის შემდეგ, დღეს სამართალდამცველებმა შენობის კარი აჭედეს, და პოლიციის ლენტით შემოსაზღვრეს.

[sknews.ge]