ახალციხის მერობის კანდიდატები მიღებულ შედეგებს აფასებენ

ახალციხეში ხმების ყველაზე მეტი 69.28% "ქართული ოცნების" მერობის კანდიდატმა ზაზა მელიქიძემ მიიღო, ყველაზე ნაკლები – 0.59% „თავისუფლება – ზვიად გამსახურდიას გზის“ მერობის კანდიდატმა ჯიმშერ გოგოლაურმა.

„ხალხი ქუჩაში მხვდებოდა და მეუბნებოდა, რომ ხმას მე მაძლევდნენ, რადგან მიცნობენ და იციან ვინ ვარ, მაგრამ ტოტალურად დააშინეს მოსახლეობა, ამიტომ მივიღე ხმების ის ოდენობა რაც მივიღე“, – ამბობს ჯიმშერ გოგოლაური.

მიღებული ხმების ოდენობით გმარჯვებული კანდიდატის შემდეგ „ევროპული საქართველოს“ მერობის კანდიდატი ვაჟა ჩიტაშვილი მოდის. მისი თქმთ, ეს ის შემთხვევაა, როცა „ძალა აღმართს ხნავს“ და „შიში შეიქმს სიყვარულსა“: „სხვა რა გზაა, უნდა ვაღიარო არჩევნების შედეგები. ვულოცავ გამარჯვებას მმართველი გუნდის კანდიდატს და ამომრჩევლისთვის მიცემული დაპირებების შესრულებას ვუსურვებ“.

მისი თქმით, კარგი იქნებოდა, არჩევნები თავისუფალ გარემოში ჩატარებულიყო, მაგრამ ასე არ მოხდა: „დემოკრატიულად ჩატარებული არჩევნების შემთხვევაში მნიშვნელობა არ აქვს ვინ იმარჯვებს, მაგრამ ნათქვამია „გამარჯვებულს არ ასამართლებენო“ და მართლაც ასეა“.

ხალხის არჩევანს დამოკრატიული არჩევნების შემთხვევაში პატივს სცემს ირაკლი ბარძიმაძეც, თუმცა ამბობს, რომ ის რა შედეგიც დადგა, ხალხს არ გადუწყვეტია: „ამ არჩევნებმა აჩვენა, რომ აღარასდროს შეიცლვება ამ ქვეყანში ხელისუფლება არჩევნების გზით. ყველას აკონტროლებდნენ, ურეკავდნენ, ან მიდიოდნენ და ეუბნებოდნენ რა როგორ უნდა გაეკეთებინათ".

მისი თქმით, ყველაზე ცუდი რაც ამ არჩევნებზე მოხდა არის ის, რომ არასამთავრობო სექტორმა, დამკვირვებლებმა, პრესამ და ტელევიზიამ ხალხზე ძალადობის ლეგალიზება დაუშვა: „გადაღებულიც გვაქვს და გასაჩივრებულიც როგორ მიჰყავთ ამომრჩევლები უბნებზე, როგორ შედიან მათთან ერთად კაბინაში ორ–ორი და გამოჰყავთ ისევ“.

ამომრჩეველზე ზეწოლა რომ განხორციელდა, ამაზე „პატრიოტთა ალიანსის“ მერობის კანდიდატი ჯუმბერ ინასარიძეც საუბრობს: „შარშანდელ არჩევნებზე მოსახლეობის დაშინება მეორე ტურის დროს დაიწყეს, წელს კი ორი თვით ადრე. შარშან ერთ კვირაში მივიღე სამჯერ ამაზე მეტი ხმა და თან მხოლოდ ქალაქში. წელს კი მასიური ტერორი განხორციელდა“.

კატეგორიულად უარყოფს რაიმე ტიპის ზეწოლებს ‘ქართული ოცნების’ გამარჯვებული მერობის კანდიდატი ზაზა მელიქიძე. ის ამომრჩეველს ნდობისთვის მადლობას უხდის და ამბობს, რომ ეს დიდი პასუხისმგებლობაა: „შედეგები სახეზეა, მოსახლეობამ არჩევანი უკვე გააკეთა. ყველასი მადლობელი ვარ, ვინც მხარი დამიჭირა“.

[თამუნა უჩიძე, ახალციხე]