მერობის კანდიდატები წინასარჩევნო კამპანიებს ასრულებენ

ახალციხის მერობისთვის ხუთი კანდიდატი იბრძვის: „ქართული ოცნებიდან“, „ნაციონალური მოძრაობიდან“, „ეროვნული ფორუმიდან“, „პაატა ბურჭულაძე-სახელმწიფო ხალხისთვის“ და „პატრიოტთა ალიანსიდან“. წინასაარჩევნოთ ხუთივე კანდიდატი თანხმდება, რომ წინასაარჩევნო კამპანია მშვიდ გარემოში მიმდინარეობდა და დარღვევებს ადგილი არ ჰქონია.

„ყველაზე მშვიდი საარჩევნო პროცესი იყო, მსგავსი ბოლო არჩევნების განმავლობაში არ მახსოვს“, - ასე აფასებს „პაატა ბურჭულაძე-სახელმწიფო ხალხისთვის“მერობის კანდიდატი ივანე გვარამაძე წინასაარჩევნო გარემოს.

მისი თქმით, ქალაქის რამდენიმე ქუჩაზე დარჩა მისასვლელი, იმისათვის, რომ ამომრჩეველს საკუთარი ხედვა გააცნოს და მზადებას დაასრულებს. იგი ყველაზე სერიოზულ კონკურენტად „ნაციონალურ მოძრაობისა“ კანდიდატს ირაკლი ერეკლიშვილს მიიჩნევს.

წინასაარჩევნო კამპანიას ასრულებს მერობის კანდიდატი „ეროვნული ფორუმიდან“ ჯუმბერ ინასარიძეც. მისი შეფასებითაც, საარჩევნო კამპანია მშვიდ გარემოში მიმდინარეობდა. იგი რეალურ კონკურენტად სახელისუფლებო კანდიდატს მიიჩნევს: „მთავრობაში არიან და მეტი ბერკეტი აქვთ იმისათვის, რომ არჩევნები მოიგონ“.

კანდიდატების უმეტესობა, ქალაქში, მთავარ პრობლემად ინფრასტრუქტურის მოუწესრიგებლობასა და დაუსაქმებლობას მიიჩნევს. ტურიზმზე ზრუნვა მიაჩნია მთავარ პრიორიტეტად „პატრიოტთა ალინსის“ კანდიდატს ბესიკ ტაბატაძეს: „ახალციხეში ტურისტი რომ ჩამოვა და „ახალციხის ციხეს“ ნახავს, აქედან წასვლა აღარ უნდა მოუნდეს, ამით უკვე აქ კერძო ბიზნესაც განვავითარებთ და ბიუჯეტშიც დამატებით თანხა შემოვა“.

ტაბატაძის მსგავსად, გამარჯვების შემთხვევაში, ტურისტული პოტენციალის გაუმჯობესებას გეგმავს „ნაციონალური მოძრაობის“ კანდიდატი ირაკლი ერეკლიშვილიც. მისი თქმით, ქალაქში თუ მის მიმდებარედ ტურიზმის განვითარება და დახვეწა, ახალციხეში არსებულ სხვა პრობლემებსაც მოაგვარებს. იგი აქცენტს მოსახლეობის ჩართულობაზე აკეთებს: „მნიშვნელოვანიხალხთან ურთიერთობა, მათი აზრის გაზიარება და საქმის ისე კეთებაა“.

მოსახლეობას ქალაქში საკანალიზაციო სისტემის პრობლემის მოგვარებას ჰპირდება, სახლისუფლებო პარტიის მერობის კანდიდატი ვლადიმერ ზედგინიძე.

„ქართული ოცნების“ მერობის კანდიდატის თქმით, ქალაქში პრობლემები არსებობს, თუმცა უმრავლესობა, მათ შორის კეთილმოწყობის კუთხით, მოგვარებულია.

„ტენდერები ქუჩების მოსფალტებისთვის უკვე გამოცხადებულია. წლის ბოლომდე დასრულდება ქალაქის განათების სამუშაოებიც, თუმცა ისევ უნდა ვიზრუნოთ სოციალურ საკითხებზე“, –განმარტავს ვლადიმერ ზედგინიძე.

მერობის კანდიდატებს იმისათვის, რომ ამომრჩეველს თავიანთი პროგრამა გააცნონ და მათი პრობლემები მოისმინონ ერთი დღე დარჩათ. საარჩევნო კოდექსის მიხედვით, 7 ოქტომბერს საღამოს, 20:00 საათიდან, მათ წინასაარჩევნო აგიტაცია ეკრძალებათ.

[ლუბა გიორგაძე, ახალციხე]