სოფელ ფერსაში კლუბის შენობა დაიწვა [Photo]

სოფელ ფერსაში კლუბის შენობას ხანძარი დღეს, 10 ოქტომბერს, დაახლოებით 11:00 საათისთვის გაუჩნდა. დაიწვა შენობაში განთავსებული ბიბლიოთეკა და რიტუალების სახლი.ამ წუთებში ხანძრის ლოკალიზება მიმდინარეობს.

ადგილობრივების განმარტებით, ხანძარი შენობაში დროებით შესახლებული ოჯახის დაუდევრობამ გამოიწვია.

„ღუმელი, რომ აანთეს, გოგონა გამოსულა გარეთ. მოგვიანებით მეზობელმა დაინახა ფანჯარაში ცეცხლი და ატეხა განგაში“, – ამბობს გამგებლის წარმომადგენელი ფერსის ადმინისტრაციულ ერთეულში გიორგი ბლიაძე.

„პირველი მე დავინახე და სოფელი შევყარე. არავინ იყო შიგნით. რიტუალების სახლიდან ჭურჭლის ნაწილი გამოიტანეს, მაგრამ პლასტიკატს ეკიდა ცეცხლი და საშიში იყო“, – ამბობს ფერსაში მცხოვრები ევგენია წიკლაური.

მისი თქმით, პირველ ეტაპზე სოფელში ცეცხლს ორი სახანძროს მანქანა აქრობდა, მოგვიანებით გამოიძახეს ბრიგადები ბორჯომიდანაც.

სახანძრო – სამაშველო სამსახურში განაცხადეს, რომ შეტყობინება ფერსიდან 10:50 საათზე შევიდა, ხანძრის ჩასაქრობად სოფელში რვა სახანძროს მანქანა გავიდა. ცეცხლის ლოკალიზება 12:08 საათისთვის მოხერხდა.

„ხანძარი ჩამქვრალია, ამ ეტაპზე მიმდინარეობს სალიკვიდაციო სამუშაოები“, – აცხადებენ სახანძრო–სამაშველო სამსახურში.

ახალციხის მუნიციპალიტეტის გამგებლის წარმომადგენელი ფერსის ადმინიტრაციულ ერთეულში განმარტავს, რომ ღია ცისქვეშ დარჩენილ ოჯახს დროებით, სოფელ ღრელში, ნათესავის ოჯახში გადაიყვანენ.

შემთხვევის ადგილზე იმყოფებოდნენ ახალციხის მუნიციპალიტეტის გამგეობის თანამშრომლებიც.

შსს–ში განმარტავენ, რომ ძიება სსკ–ის 187–ე მუხლის მეორე ნაწილით მიმდინარეობს, რაც სხვისი ნივთის დაზიანებას გულისხმობს.













[თინათინ ზაზაძე, ახალციხე]