საპარლამენტო და ახალციხის მერის არჩევნები

სამ მაჟორიტარულ ოლქში 27 კანდიდატია დარეგისტრირებული, ამათგან 24 პოლიტიკური პარტიების მიერაა წარდგენილი, სამი კი დამოუკიდებელი კანდიდატია.

N44 ახალციხე–ადიგენის ოლქში, სადაც 50.293 ამომრჩეველია, არჩევანი ცხრა კანდიდატს შორის უნდა გააკეთონ.

N45 ბორჯომი –ასპინძის ოლქის 34.308 ამომრჩეველი, საკანონმდებლო ორგანოს წევრს ათ კანდიდატს შორის შეარჩევს. ამ ათიდან 1 ქალია, 9 კი კაცი.

N46 ახალქალაქი–ნინოწმინდის ოლქში რეგისტრირებული 51.843 ამომრჩეველი კი არჩევანს 8 კანდიდატს შორის გააკეთებს.

ჯამში, 2016 წლის საპარლამენტო არჩევნებისთის, სამცხე–ჯავახეთში 146.160 ამომრჩეველია დარეგისტრირებული.

დღეს რეგიონში 212 საარჩევნო უბანი გაიხსნება, აქედან შშმ პირებისთვის ადაპტირებულია 56 უბანი.

ამ დრომდე საქართველოში რვა საპარლამენტო არჩევნები ჩატარდა.

საქართველოში პარლამენტი ერთპალატიანია და 150 დეპუტატისგან შედგება. აქედან 77–ს პროპორციული სისტემით ვირჩევთ, 73–ს კი მაჟორიტარულით.

დღესვე, ახალციხეში დარეგისტრირებული 15 057 ამომრჩეველი ქალაქის მერს აირჩევს. მერის რიგგარეშე არჩევნები იმის გამო დაინიშნა, რომ ყოფილი მერი მმართველი გუნდის მაჟორიტარობის კანდიდატია და მერის პოზიცია დატოვა.

ხმის მიცემა ქალაქის მასშტაბით 13 უბანზეა შესაძლებელი. ახალციხის მერობა ხუთ კანდიდატს სურს, ხუთივე მათგანი მამაკაცია.

მერობის კანდიდატები არიან:
N1 ივანე გვარამაძე – "პაატა ბურჭულაძე – სახელმწიფო ხალხისთვის“;
N5 ირაკლი ერეკლიშვილი – ბლოკი "ერთიანი ნაციონალური მოძრაობა“;
N8 ბესიკ ტაბატაძე – "საქართველოს პატრიოტთა ალიანსი“;
N26 ჯუმბერ ინასარიძე – პარტია "ეროვნული ფორუმი“;
N41 ვლადიმერ ზედგინიძე – პარტია "ქართული ოცნება“.

8 ოქტომბერს არჩეული ახალი მერი, თანამდებობაზე ქალაქ ახალციხის საკრებულოს უფლებამოსილების დარჩენილი ვადით იმუშავებს.

საარჩევნო უბნები 08:00 საათზე გაიხსნება და საღამოს, 20:00 საათზე დაიხურება. ცესკოს მონაცემებით, ამომრჩეველთა ერთიან სიაში რეგისტრირებულია 3 513 884 ამომრჩეველი.

[sknews.ge]