ახალციხის მერობის კანდიდატი „ეროვნული ფორუმიდან“ ჯუმბერ ინასარიძეა

ჯუმბერ ინასარიძე პირველია, რომელმაც ახალციხის მერობის კანდიდატად რეგისტრაციისთვის საოლქო კომისიას მიმართა. მან განაცხადი დღეს, 5 სექტემბერს შეიტანა.

როგორც N37–ე ახალციხის საოლქო საარჩევნო კომისიის კომისიის თავმჯდომარე თეა გავაშელი განმარტავს, აღნიშული დოკუმენტები განხილვის პროცესშია. თუკი განაცხადი სრულყოფილი იქნება, კანდიდატი ოფიციალურად დარეგისტრირდება.

შეგახსენებთ, რომ წინასაარჩევნო კამპანიის პერიოდში ჯუმბერ ინასარიძე პარტია ,,საქართველოს პატრიოტთა ალიანსის“ სამცხე–ჯავახეთის კოორდინატორი იყო, თუმცა აგვისტოში მან აღნიშნული პარტია დატოვა და ,,ეროვნულ ფორუმს“ შეუერთდა.

საარჩევნო კოდექსის 167–ე მუხლის მიხედვით, მერობის კანდიდატი რეგისტრაციაში გატარდება თუკი იგი შესაბამის საოლქო საარჩევნო კომისიას წარუდგენს:

ა) კანდიდატის სააღრიცხვო ბარათი;
ბ) კანდიდატის წარდგენის შესახებ განცხადებას, რომელიც დამოწმებულია ხელმძღვანელ პირთა ხელმოწერებით;
გ) ორ ფოტოსურათს;
დ) კანდიდატის საქართველოს მოქალაქის პირადობის მოწმობის, ან საქართველოს მოქალაქის პასპორტის ფოტოასლი.
მერობის კანდიდატად დარეგისტრირება, პარტიების მიერ დასახელებულ კანდიდატებს 8 სექტემბრამდე შეუძლიათ.



[თაკო ფეიქრიშვილი, ახალციხე]