უნივერსიტეტს შუქი გამოურთეს

თანხის გადაუხდელობის გამო უნივერსიტეტის ორივე კორპუსს და პროფესორ-მასწავლებელთა საერთო საცხოვრებელს ელექტროენერგია გუშინ, დღის მეორე ნახევარში გაუთიშეს.

უნივერსიტეტის დირექციაში ამბობენ, რომ თანხა არის, თუმცა ბიუჯეტის დამტკიცებამდე მის გამოყენებას ვერ შეძლებენ.

”ბიუჯეტის დამტკიცებას ველოდებით რეგენტთა საბჭოსგან. როგორც კი დამტკიცდება, გადავიხდით და შუქიც გვექნება, მანამდე თანხის გადახდის უფლება არ გვაქვს”, - გვითხრა უნივერსიტეტის რექტორმა მერაბ ბერიძემ.

უნივერსიტეტში ამბობენ, რომ ელექტროენერგიის მიწოდება სასწავლო პროცესის დაწყებამდე აღდგება.

”დახლოებით ერთ კვირაში შეგვეძლება თანხის გადახდა ”,-განაცხადა სატელეფონო საუბარში უნივერსიტეტის რექტორმა.

ამ ეტაპზე უნივერსიტეტში ზამთრის არდადეგებია. სასწავლო პროცესი 18 თებერვლიდან განახლდება, თუმცა ერთი კვირით ადრე, 11 თებერვალს საგამოცდო პროცესი დაიწყება იმ სტუდენტებისთვის, რომელთაც წინა სემესტრის გამოცები აქვთ გადასაბარებელი.

უნივერსიტეტს, დავალიანების გამო, ელექტროენერგიის მიწოდება რამდენიმე დღით გასული წლის დეკემბრის ბოლოსაც შეუწყდა.

[თინათინ ზაზაძე, ახალციხე]