უნივერსიტეტის რექტორი სკოლის დირექტორებს შეხვდა

შეხვედრა სამცხე-ჯავახეთის სახელმწიფო სასწავლო უნივერსიტეტის მეორე კორპუსში გაიმართა და მას ახალციხის მუნიციპალიტეტის 23 საჯარო სკოლის დორექტორი ესწრებოდა.

”ჩვენი შეხვედრა სარეკლამო ხასიათის იყო. ეროვნული გამოცდები ახლოვდება და დიდი მნიშვნელობა აქვს იმას, თუ რამდენი აბიტურიენტი ჩაწერს პირველ ნომრად ჩვენს უნივერსიტეტს. გავაცანით უნივერსიტეტი, ჩვენი პროგრამები და რამდენიმე ახალი წინადადებაც გაჩნდა”, - ამბობს სამცხე-ჯავახეთის სახელმწიფო სასწავლო უნივერსიტეტის რექტორი მერაბ ბერიძე.

რექტორთან ერთად შეხვედრას უნივერსიტეტის ადმინისტრაცია და ოთხივე ფაკულტეტის დეკანი ესწრებოდა. მათ სკოლის დირეტორებთან კონკრეტულ პროგრამებსა და მიმართულებებზე ისაუბრეს.

თავის მხრივ, სკოლის დირექტორები ცდილობდნენ იმ კითხვებზე მიეღოთ პასუხი, რაც მოსწავლეებს აწუხებთ. მათი თქმით, უკეთესი იქნება თუ მსგავსი შეხვედრა აბიტურიენტებისთვისაც მოეწყობა.

”რეგიონში უნივერსიტეტის არსებობა აუცილებელია. ეკონომიური მხარე ძალიან გასაზღვრავს ბავშვების მომავალს. თუკი ზუსტად იგივე პროგრამას გაივლიან ამ უნივერსიტეტში, რასაც დედაქალაქში და განათლების მიღება უფრო ნაკლები თანხა დაუჯდებათ, უკეთესი იქნება”, - ამბობს ვალის პირველი საჯარო სკოლის დირექტორი ირა გოგილაშვილი.

სკოლის დირექტორების თქმით, სასურველია უნივერსიტეტში ფაკულტეტები საბუნებისმეტყველო (ქიმია, ფიზიკა, ბიოლოგიის სპეციალობებზე) მიმართულებებითაც არსებობდეს.

უნივერსიტეტის რექტორმა მერაბ ბერიძემ აღნიშნა, რომ გავრცელდა ინფორმაცია თითქოს უნივერსიტეტს აკრედიტაცია შეუწყდა, რაც სიმართლეს არ შეესაბამება.

”გავრცელდა ინფორმაცია, რომ აკრედიტაცია შეგვიწყვიტეს. თუმცა, ეს იყო სამართლებრივი საკითხი. უბრალოდ, როცა ორი უმაღლესი სასწავლებელი ერთიანდება, ამას გარკვეული იურიდიული პრობლემები ახლავს. ამ პრობლემებისა და სამართლებრივ ფონზე მოხდა აკრედიტაციის ხელახალი დამტკიცება”, - განმარტავს მერაბ ბერიძე.

[თამარ თოთაძე, ახალციხე]