უნივერსიტეტი პარალიზებულია

სამცხე-ჯავახეთის სახელმწიფო სასწავლო უნივერსიტეტს დღეს 12:00 საათზე ენერგოკომპანიაში დავალიანების დაფარვის ბოლო ვადა ამოეწურა. ამიტომ სასწავლებელში შუქი გამორთეს.

”ელქტროენერგიის გარეშე ვერც გათბობა მუშაობს და არც ინტერნეტი გვაქვს. ხვალიდან გენერატორებს ავამუშავებთ, რომ კომპიუტერები ჩაირთოს და ინტერნეტი იყო. სიცივეს ცოტას გავუძლებთ”, - ამბობს სამცხე-ჯავახეთის სახელმწიფო სასწავლო უნივერსიტეტის რექტორის მოვალეობის შემსრულებელი მერაბ ბერიძე.

სასწავლებლის რეორგანიზაციის შემდეგ ახალი წესდებაა დასამტკიცებელი. იმის გამო, რომ ამ დრომდე ვერ შეიკრიბა რეგენტთა საბჭო, რომელმაც აღნიშნული დოკუმენტი უნდა დაამტკიცოს, სასწავლებელი ვერც თანამშრომელთა ხელფასებს გასცემს და ვერც კომუნალურ ხარჯებს ფარავს.

- ”წლის ბოლოა, ბევრი სირთულეა და ამან განაპირობა ის, რომ სხდომა ვერ ჩატარდა. საბჭოში რამდენიმე მინისტრის მოადგილე შედის და დღეს თუ არა, ხვალ მაინც შეიკრიბება. ძალიან აქტიური პოზიცია აქვს სამინისტროს ამ საკითხთან დაკავშირებით და 2 დღეში ყველაფერი მოგვარდება”, - გვიხსნის ბერიძე.

მისი თქმით, ამ დროისთვის უნივერსიტეტი პარალიზებულია: ”თუმცა, ეს არ ნიშნავს იმას, რომ ქვეყანა ინგრევა, 90-იან წლებში მთელი ზამთარი გვიმუშავია გაყინულ აუდიტორიებში”.

[თამუნა უჩიძე, ახალციხე]