ექსტერნად გამოცდების ჩაბარების მსურველთა რეგისტრაცია 14 თებერვლიდან დაიწყება

საქართველოს განათლებისა და მეცნიერების სამინისტროს ინფორმაციით, გამოცდების ჩაბარების მსურველმა, რეგისტრაციის თაობაზე საგანამანათლებლო რესურსცენტრს უნდა მიაკითხოს. თუ მსურველი არასწრულწლოვანია, განაცხადის შეტანის უფლება აქვს მის კანონიერ წარმომადგენელს.

თუ პირი, რომელსაც გამოცდის ჩაბარება სურს, სკოლაში სწავლობს, რეგისტრაცია იმ რესურსცენტრში უნდა გაიაროს, რომლის სამოქმედო ტერიტორიაზეც მისი სკოლა მდებარეობს. ხოლო, თუ პირი არ სწავლობს სკოლაში, განცხადების შეტანა ნებისმიერ რესურსცენტრში შეუძლია.

სამინისტროში აცხადებენ, რომ გამოცდა ტარდება წერითი ფორმით, ტესტირების გზით და მას ატარებს ის სკოლა, რომელშიც სწავლობს მოსწავლე ან პირს სურს რომ გააგრძელოს სწავლა. ხოლო, მე-12 კლასში შემავალი საგნის/საგნების (ქართული ენა და ლიტერატურა, მათემატიკა, ისტორია, ინგლისური ენა, სამოქალაქო თავდაცვა და უსაფრთხოება) ზოგადსაგანმანათლებლო სასწავლო პროგრამის/პროგრამების ექსტერნატის ფორმით დაძლევის გამოცდა ტარდება ცენტრალიზებულად, ელექტრონული ფორმით.

პირმა, რომელიც წარმატებით ჩააბარებს ექსტერნატის გამოცდებს, სრული ზოგადი განათლების დამადასტურებელი დოკუმენტის მისაღებად, სკოლის გამოსაშვები გამოცდები უნდა ჩააბაროს.

„ამასთან გაცნობებთ, რომ პირზე, რომელმაც ზოგადი განათლების საშუალო საფეხურის კლასის/კლასების, ან საშუალო საფეხურის ცალკეულ კლასში შემავალი საგნის/საგნების ზოგადსაგანმანათლებლო სასწავლო პროგრამა/პროგრამები წარჩინებით დაძლია ექსტერნატის ფორმით, ოქროსა და ვერცხლის მედალოსნის ატესტატი არ გაიცემა“, - აცხადებენ სამინისტროში.

[sknews.ge]