„ქართული ოცნების“ დროშა ანდის სკოლაზე

დღეს, 2 სექტემბერს მოქალაქემ „სამხრეთის კარიბჭეს“ ახალციხის მუნიციპალიტეტის სოფელ ანდის სკოლის ფოტო მიაწოდა, რომელზეც ჩანს, რომ სკოლის შესასვლელ კართან „ქართული ოცნების“ დროშაა გამოკიდებული.

ანდაში მოქმედი სკოლა, არასრულია და ანდრიაწმინდის საჯარო სკოლას ეკუთვნის. როგორც ანდის დაწყებითი კლასების ერთ–ერთი მასწავლებელი ქეთევან ქიმერიძე ამბობს, ორი დღის წინ სოფელში „ქართული ოცნების“ წარმომადგენლები იყვნენ: „დროშებიც დაურიგებიათ. ჩვენი პედაგოგები იყვნენ გუშინ სკოლაში და იქ გამოკრული არაფერი იყო, ალბათ დღეს გააკეთეს“.

„ქართული ოცნების“ წარმომადგენლები, რომ სოფელ ანდაში ნამდვილად იყვნენ და დროშებიც დაარიგეს, ამას „ქართული ოცნების“ ახალციხის შტაბის ხელძღვანელი გიორგი გვარამაძეც გვიდასტურებს. თუმცა იმას, რომ სკოლაზე სააგიტაციო მასალა გააკრეს კატეგორიულად უარყოფს: „ამას ალბათ ვინმე ჩვენი არაკეთილისმოსურნე გააკეთებდა, თორემ არცერთი ჩვენიანი ამას არ იზამდა“.

იურისტების განცხადებით, სკოლაში პოლიტიკური აგიტაცია იკრძალება და ამ შემთხვევაში ზოგადი განათელბის შესახებ კანონი ირღვევა: „პარტიული დროშის სკოლაში დამაგრება პოლიტიკური აგიტაციაა და ეს კანონდარღვევაა. ადმინისტრაცია ვალდებულია სააგიტაციო ხასიათის მასალა სკოლიდან მოხსნას“.

მას შემდეგ რაც „სამხრეთის კარიბჭემ“ მომხდართან დაკავშირებით სკოლის ადმინისტრაციასთან ვითარების გარკვევა სცადა, პედაგოგებმა, როგორც სატელეფონო საუბარში განაცხადეს, სკოლის შესასვლელიდან დროშა ჩამოხსნეს. მათი ვარაუდით, სააგიტაციო მასალა სასწავლებლის კართან ბავშვებმა დაამაგრეს.

„სკოლა აპოლიტიკურია, ასეთი რამ ჩვენთან არასდროს ყოფილა“, – ამბობს ანდრიაწმინდის სკოლის დირექტორი ლამზირა ხაჩიძე.

[თამუნა უჩიძე, ახალციხე]