ღია გაკვეთილი 'ქართული ოცნების' დროშებით

27 სექტემბერს, სოხუმის დაცემის დღესთან დაკავშირებით, ბორჯომის პირველი საჯარო სკოლის ხატვის მასწავლებელმა ნათელა ღლონტმა მეექვსე კლასელებს ღია გაკვეთილი ჩაუტარა. მოსწავლეებს, ასფალტზე ხატვის დროს, ეროვნულ დროშასთან ერთად, პოლიტიკური პარტია „ქართული ოცნების“ დროშები ეკავათ.

აღნიშნული ინფორმაცია ადგილობრივმა ტელეკომპანია „ბორჯომმა“ გაავრცელა. კადრებში ჩანს, როგორ უკავიათ დროშები ხელში პედაგოგსა და მის მოსწავლეებს. ნათელა ღლონტი ტელეკომპანა ბორჯომის ჟურნალისტთან ადასტურებს, რომ დროშები ღია გაკვეთილზე თავად მიიტანა.

მოგვიანებით მან „სამხრეთის კარიბჭესთან“ აღნიშნული ინფორმაცია უარყო და განაცხადა, რომ დროშები მოსწავლეებმა ქალაქში, სკამებზე იპოვეს და აიღეს: „გაკვეთილს ვატარებდი, ეს დროშები იქვე, სკამებზე იყო, ბავშვებმა აიღეს და მეც ავიღე, გამოვართვი და ვხატავდი. არ მეცალა მე, დიდ ღონისძიებას ვატარებდი, ვერ გავაცნობიერე, სპონტანურად ავიღე ხელში. არასოდეს არცერთი პარტიის მხარდამჭერი არ ვყოფილვარ, რა ფიგურა გამხადეს. ერთი ჩვეულებრივი ხატვის მასწავლებელი ვარ“.

როგორც „სამხრეთის კარიბჭესთან სკოლის დირექტორი აცხადებს, ქალაქის ცენტრში ღია გაკვეთილის ჩატარების ინიციატივა ხატვის მასწავლებელს ეკუთვნოდა. რაც შეეხება დროშებს, სკოლის ადმინიტრაციისთვის უცნობია, საიდან მიიტანა ღია გაკვეთილზე აღნიშნული დროშები პედაგოგმა.

„ნათელა ღლონტი ღია გაკვეთილების ჩატარებით ცნობილია, სხვადასხვა ეროვნულ დღესასწაულზე ხშირად მართავს ასფალტზე ხატვის გაკვეთილებს. გაოცებული დავრჩი, როდესაც ტელევიზიის სიუჟეტი ვნახე. აღნიშნულ მასწავლებელს სკოლიდან არ გაუტანია არანაირი დროშა, გაიტანა მხოლოდ ფერადი ცარცები. მეც ველოდები მასწავლებლის ახსნას. არ ვიცი საიდან მიიტანა და რა მიზნით გამიყენა ეს დროშები“, – ამბობს სკოლის დირექტორი ჯული ჯინჯოლავა.

სკოლის დირექტორი ირწმუნება, რომ მომხდარის შესახებ სკოლის დისციპლინური კომიტეტი იმსჯელებს: „ეს არის მასწავლებლის მხრიდან სკოლის შინაგანაწესის, ასევე, ეთიკის კოდექსის და განათლების კანონის დარღვევა, იმიტომ, რომ სკოლა არის აბსულუტურად აპოლიტიკური. მასწავლებელს არ აქვს უფლება მოსწავლე მსგავსი აქსესუარით გაიყვანოს, ეს იქნება ღია გაკვეთული თუ რაც იქნება“.

მომხდარის შესახებ ახსნა–განმარტებას ელოდება ბორჯომის საგანმანათლებლო რესურსცენტრის ხელმძღვანელობაც: „ჩვენ არ ვართ საქმის კურსში. დაუკავშირდით დირექტორს და მისგან მიიღეთ ინფრომაცია. მეც ველოდები დირექტორისგან ახსნა–განმარტებას“.

საქართველოს განათლებისა და მეცნიერების სამინისტროში აცხადებენ, რომ ვინაიდან ზოგადი განათლების შესახებ კანონის თანახმად, სკოლა თავისუფალი უნდა იყოს პოლიტიკისა და პოლიტიკური აგიტაციისგან, შესაბამისად, სამინისტროს შიდა აუდიტის დეპარტამენტი დაინტერესდება ამ ფაქტით და შესაბამის ზომებს მიიღებს.




[თინათინ ზაზაძე, ბორჯომი]