ვალეში საარჩევნო უბანთან, სკოლასა და საბავშვო ბაღზე ‘ოცნების’ პლაკატები მოხსნეს

ვალეს მეორე საჯარო სკოლის, ასევე პირველი საბავშვო ბაღის ჭიშკრებზე „ქართული ოცნების“ სააგიტაციო მასალა გაკრული აღარაა. ახალციხე–ადიგენის ოლქში „ქართული ოცნების“ მაჟორიტარი დეპუტატობის კანდიდატის გიორგი კოპაძის პლაკატი, არა მხოლოდ ბაღისა და სკოლის, არამედ N10 ვალეს საარჩევნო უბნის შესასვლელიდანაც მოხსნეს.

„გავარკვიე, რომ არ შეიძლებოდა და ჩამოვხსენი“, – ამბობს ვალეს საბავშვო ბაღის მენეჯერი ქეთევან ლაფაჩი.

მეორე საჯარო სკოლის დირექტორი გვანცა გოგოლაძე ამბობს, რომ სააგიტაციო მასალა სკოლაზე იმ დღესვე [როცა „სამხრეთის კარიბჭე“ ვითარების გაკრვევით დაინტერესდა] აღარ იყო: „ვინ მოხსნა არ ვიცი, ისე როგორც ის არ ვიცი, ვინ გააკრა“.

„ქართული ოცნების“ ახალციხის შტაბში აცხადებენ, რომ აკრძალული ადგილებიდან პლაკატები თავად მოხსნეს.

„თუ სადმე იყო აკრძალულ ადგილზე, დიახ, მოიხსნა. არ ვიცით ვინ გააკრა ეს პლაკატი. მაგრამ რადგან ამას აჟიოტაჟი მოყვა, ჩვენი მხრიდან იმიტომ გადაწყდა ამის ჩამოცილება“, – ამბობს „ქართული ოცნების“ ახალციხის შტაბის ხელმძღვანელი გიორგი გვარამაძე.

შეგახსენებთ, „სამხრეთის კარიბჭემ“ მასალა იმის შესახებ, რომ ვალეში საბავშვო ბაღის, სკოლისა და საარჩევნო უბნის შესასვლელთან „ოცნების“ სააგიტაციო მასალა იყო გამოკრული, 12 სექტემბერს გამოაქვეყნა.





[თამუნა უჩიძე, ახალციხე]