სოფელ ფარეხაში, სადაც მხოლოდ 5 ოჯახი ცხოვრობს, კორპუსს გაარემონტებენ

ფარეხის დასახლებას სოფლის სტატუსი აქვს, თუმცა ამ დროისათვის ტერიტორიაზე მხოლოდ ორი ორსართულიანი საცხოვრებელი კორპუსია. ადგილობრივების არ არსებობის გამო, ერთი მათგანი გაუქმებულია, მეორეში კი ხუთი კაცი ცხოვრობს.

იმ კორპუსის რეაბილიტაცია, სადაც ადგილობრივები ცხოვორბენ, 32 025 ლარის ფარგლებში უნდა განხორციელდეს. სამუშაოებისათვის ადიგენის გამგეობამ ტენდერი 24 აგვისტოს გამოაცხადა. მშენებელი კომპანიებისათვის წინადადებების მიღების ვადა კი 19 სექტემბერს მთავრდება.

როგორც ადიგენის გამგეობაში განმარატვენ, რეაბილიტაცია ჩაუტარდება ამორტიზებულ სახურავს, საიდანაც შენობაში წყალი ჟონავს. ასევე მიშენებული ლოჯი მოინგრევა და მის ნაცვლად ახალი მიშენება გაკეთდება, იგეგმება კორპუსის ფასადის მოწესრიგებაც.

სატენდერო დოკუმენტაციის თანახმად, ტენდერში გამარჯვებულმა კომპანიამ შემდეგი სამუშოები უნდა შეასრულოს:

1.არსებული სახურავის დემონტაჟი;
2.მიშენებული ხის ლოჯიების დემონტაჟი (სამხრეთის მხრიდან);
3.ამორტიზებული აგურის კედლის დემონტაჟი;
4.ფასადიდან ძველი ლესილის ჩამოყრა;
5.მიწის სამუშაოები;
6.მონოლითური ბეტონისა და რკინა– ბეტონის სამუშაოები;
7.სახურავის ხის კარკასის აღდგენა და მოთუთიებული პროფნასტილით დახურვა;
8.მეტალოკონსტრუქციით ლოჯიების მოწყობა;
9.შედუღების სამუშაოები (საველე პირობებში);
10.შელესვის სამუშაოები;
11.სამღებრო სამუშაოები;
12.სადურგლო სამუშაოები;
13.სამშენებლი ნაგავის დატვირთვა– გატანა.

აღნიშნული სამუშოებისთვის შესაბამისი თანხა ადგილობრივი თვითმმართველობის ბიუჯეტიდან გამოიყო.

ფარეხა ადიგენის მუნიციპალიტეტში, სოფელ ვარხანის ადმინისტრაციულ ერთეულში შედის. იგი დაბა ადიგენიდან დაახლოებით 17 კილომეტრით არის დაშორებული. სოფელი ამ დროისათვის დაცლილია.

"გასულ წელს, ფარეხაში გარკევული სამუშაოები ჩატარდა, თუმცა ეს არ იყო საკმარისი, რადგან შენობა ძალიან ძველია და ფაქტობრივად დანგრევის პირას არის მისული. შესაბამისად, სიტუაციას კარგად ვიცნობთ“ , – განმარტავს ადიგენის გამგეობის საზოგადოებასთან ურთიერთობის სამსახურის წარმოამდგენელი მამუკა კალანდაძე.

[თაკო ფეიქრიშვილი, ადიგენი]