12.710 ლარი ფირნიშის გადატანა–შეღებისთვის

ადიგენის მუნიციპალიტეტის გამგეობამ ტენდერი 14 თებერვალს გამოაცხადა, მსურველებს ტენდერში მონაწილეობის მიღება 2 მარტიდან შეუძლიათ.

სატენდერო დოკუმენტაციის მიხედვით ირკვევა, რომ სოფელ ფარეხაში ფირნიშის გადატანის აუცილებლობა აღნიშნულ ტერიტორიაზე ახალი საავტომობილო ხიდის აშენებამ გამოიწვია, რომელიც 2016 წელს გაკეთდა: “არსებული მანიშნებელი ფირნიში წარწერით "ადიგენი 2“ მოექცა ხიდის სავალი ნაწილის დაბლა, რის გამოც საჭიროა მისი გადატანა მიმდებარედ“.

ტენდერში გამარჯვებულმა კომპანიამ სამუშაოები ხელშეკრულების გაფორმებიდან 28 დღეში უნდა დაასრულოს.

კომპანიამ სოფელ ფარეხასთან მდებარე ფირნიში უნდა გადაიტანოს მიმდებარედ, ბანერზე დაამონტაჟოს განათება მზის ენერგიის ბატარეებით, ასევე აღნიშული და ადიგენში მდებარე ფირნიშები შეღებოს წყალმედეგი, შუქამრეკლი, არსებული ფერის ანალოგიური ფერის საღებავით.

შეგახსენებთ, რომ ბათუმი–ახალციხის საავტომობილო გზის 10 კილომეტრიან (სოფელი ფარეხასთან) მონაკვეთს რეაბილიტაცია 2016 წელს ჩაუტარდა. რისთვისაც 8 500 000 ლარი დაიხარჯა.

[თინათინ ზაზაძე, ადიგენი]