ასპინძაში ნიაზ დიასამიძისა და 'ჯგუფი 33 ა' – ს კონცერტი გაიმართა

ასპინძაში, სხვადასხვა სოფლებიდან ახალგაზრდები იმისთვის ჩავიდნენ, რომ ნიაზ დისამიძის კონცერტს დასწრებოდნენ. მომღერალმა მსმენელისთვის სხვადასხვა ჟანრის სიმღერები შეასრულა.

„ძალიან მომეწონა, ძალიან. კარგია, რომ მსგავსი კონცერტები ჩატარდეს, სტიმულია ხალხისთვის“,– ამბობს ადგილობრივი მერი ქართველიშვილი.

რაგბის ბაზაზე გამართული კონცერტი 20:00 საათზე დაიწყო. მომღერალმა ნიაზ დიასამიძემ ადგილობრივებს მადლობა გადაუხადა იმისთვის, რომ მათგან დიდი სითბო იგრძნო. მან აღნიშნა, რომ არ არის გამორიცხული, ვარძიაში, „შოთაობის“ დღესასწაულზეც მიიღოს მონაწილეობა.

„ჩემი გვარი ბევრი საუკუნის წინ აქ გაჩნდა. ამიტომ ჩემთვის აქ ყოფნას განსხვავებული ელფერი აქვს ყოველთვის. ურთიერთობა შედგა, მთავარი ეს არის. პუბლიკას დიდი მადლობა, ძალიან დიდი სითბო მივიღე“,– განაცხადა ნიაზ დიასამიძემ.

ასპინძაში გამართულ კონცერტს ადგილობრივი თვითმმართველობის წარმომადგენელბიც ესწრებოდნენ. ასპინძის გამგებლის, ლევან ცაბაძის თქმით, მსგავსი სახის ღონისძიებები ადგილობრივებისთვის მნიშვნელოვანია.

„ნიკასთან საუბარში გამოითქვა აზრი, რომ მოხარული იქნებოდა იმით, რომ ასპინძაში კონცერტი ჩაეტარებინა. ფაქტიურად საჩუქარი გაუკეთა ასპინძელებს და ჩამოვიდა. ახალგაზრდებისთვის ასეთი ჯგუფების ნახვა და მოსმენა მნიშვნელოვანია“, – ამბობს ასპინძის გამგებელი ლევან ცაბაძე.

შეგახსენებთ, რომ კონცერტი ასპინძის გამგების კულტურის სამსახურის ორგანიზებით გაიმართა, რისთვისაც ადგილობრივი ბიუჯეტიდან 10 000 ლარამდე თანხა დაიხარჯა.









[ვარლამ წიკლაური, ასპინძა]