ასპინძაში ფესტივალი დაიწყო – გაიხსნა ასპინძის ომის ამსახველი მონუმენტი

კახეთის გუბერნატორმა ირაკლი ქადაგიშვილმა სამცხე–ჯავახეთის გუბერნიას ერეკლე მეორის პორტრეტი უსახსოვრა.

სამცხე–ჯავახეთის გუბერნატორის განმარტებით, ვინაიდან ერეკლე მეორე ქართლ–კახეთის მეფე იყო, ფესტივალში კახეთი ამიტომ ჩაერთო. დღეანდელ ღონისძიებას თელავის გამგეობის წარმომადგენლებიც ესწრებიან.

მონუმენტის გახსნით ასპინძაში ფოლკოლური ფესტივალი დაიწყო. სპეციალურად მოწყობილ ფაცხებში სტუმრებს სამცხე–ჯავახეთის სამზარეულოს დაგემოვნება შეუძლიათ. აქვეა გამოფენები, სადაც ადგილობრივების მიერ დამზადებული სხვადასხვა ხელნაკეთი ნივთების დათვალიერებაა შესაძლებელი.

ამ წუთებში კი რეგიონის ფოლკლორული ანსამბლებისა და ინდივიდუალური შემსრულებლების კონცერტი მიმდინარეობს.

შეგახსენებთ, 18:00 საათზე საქართველოს ფოლკლორის სახელმწიფო ცენტრის მიერ ორგანიზებული კონცერტი დაიწყება, 20:00 საათზე კი გალაკონცერტი: ნიაზ დიასამიძისა და 33ა–ს მონაწილოებით.

ფესტივალს ფეიერვერკი დაასრულებს.

რეგიონალური ფოლკლორული ფესტივალი „ფუძეობა“ კომპანია GeoTourist-ის სოციალური პროექტია (სახალხო დღესასწაული), რომლის მიზანი საქართველოს რეგიონალური კულტურის განვითარების ხელშეწყობა და მხარდაჭერაა. 2017 წელს, ფესტივალი „ფუძეობა“ საქართველოს რვა რეგიონში ჩატარდება, წელს მას პროექტი “CHECK IN GEORGIA”-ც შემოუერთდა. ფესტივალის პარტნიორია ასევე, „საქარათველოს ფოლკლორის სახელმწიფო ცენტრი“.



[ნინო ნარიმანიშვილი, ლუბა გიორგაძე, ასპინძა]