სამი წლის განმავლობაში ახალქალაქის მუნიციპალიტეტის ბიუჯეტი, ტრანსფერის ზრდის ხარჯზე, უმნიშვნელოდ, მაგრამ მაინც იზრდებოდა. 2011 წელს ბიუჯეტმა 5,344,600 ლარი შეადგინა, 2012 წელს 164,200 ლარით გაიზარდა და 5,508,800 ლარს მიაღწია. საბიუჯეტო წელი 2013 წლის 1 იანვარს დაიწყო ბიუჯეტისთვის 255,900 ლარის დამატებით და ახალქალაქის მუნიციპალიტეტის ბიუჯეტის მთლიანმა თანხამ 5,764,700 ლარი შეადგინა.
ახალქალაქის მუნიციპალიტეტის 2013 წლის ბიუჯეტი 2012 წლის 28 დეკემბერს დამტკიცდა, „საქართველოს საკანონმდებლო მაცნეს“ ფურცლებზე კი დოკუმენტი 2013 წლის 9 იანვარს გაჩნდა. ამასთან დაკავშირებით არანაირი დარღვევა არ ყოფილა. თუმცა „სამოქალაქო კულტურის საერთაშორისო ცენტრის“ ხელმძღვანელის კონსტანტინე კანდელაკის თქმით, ახალქალაქის მუნიციპალიტეტის ბიუჯეტში მხოლოდ თანხებია, კონკრეტულად რისთვის არის თანხები განკუთვნილი, გასაგები არ არის.
„ახალქალაქის მუნიციპალიტეტის ბიუჯეტში, რომელიც გამოქვეყნდა ვებ გვერდზე matsne.gov.ge მხოლოდ ციფრებია. ამ დროს კი მიმდინარე წლიდან ყველა მუნიციპალიტეტი პროგრამულ ბიუჯეტირებაზე უნდა გადასულიყო. პროგრამული ბიუჯეტირება ნიშნავს, რომ ციფრების გარდა, ბიუჯეტში უნდა იდოს დეტალური ანგარიში ტექსტის სახით, რისთვის იქნება ეს თანხები განკუთვნილი. შესაძლოა ამ კონკრეტულ შემთხვევაში გამოცდილების არქონის გამო მოხდა ასე, ან ვერ მოესწრო. ამ შემთხვევაში გვაქვს მხოლოდ ციფრები და გაურკვეველია, თანხები რისთვის დაიხარჯება. ეს ბიუჯეტის მონიტორინგს ართულებს“, - განმარტავს კონსტანტინე კანდელაკი.
matsne.gov.ge-ზე გამოქვენებული დოკუმენტიდან გამომდინარე, ახალქალაქის მუნიციპალიტეტის ბიუჯეტი შედგება ცენტრალური ბიუჯეტის ტრანსფერისგან, რომელიც 5,093,700 ლარია, მათ შორის გამათანაბრებელი ტრანსფერი 4,878,700 ლარი, მიზნობრივი ტრანსფერი 215,000 ლარი.
ასევე ახალქალაქის მუნიციპალიტეტის ბიუჯეტში არის მთლიანი შემოსავალი 671,000 ლარი, საიდანაც 295,000 ლარი საგადასახადო შემოსავლებია. არაფინანსური აქტივები შემცირებულია 20,000 ლარით, სხვა „გაუგებარი“ შემოსავლები კი სულ 356,000 ლარს შეადგენს.
წელს საკანონმდებლო ორგანოს (საკრებულო) საჭიროებებისთვის ადგილობრივი ბიუჯეტიდან გამოყოფილია 554 900 ლარი. გასულ წელს ეს თანხა 347 000 ლარს შეადგენდა. შემცირებულია ახალქალაქის მუნიციპალიტეტის გამგეობისთვის გამოყოფილი თანხა, რომელიც წელს 1,824,300 ლარია, 2012 წელს კი 2,606,600 ლარი იყო. სარეზერვო ფონდის მოცულობა 10,000 ლარით გაიზარდა და 80,000 ლარი გახდა.
2012 წელს სახანძრო სამსახურმა 110,000 ლარი მიიღო, წელს კი ეს ციფრი 187,200 ლარამდე გაიზარდა. სამხედრო რეგისტრაციისა და საგანგებო სამსახურებისთვის გამოყოფილი თანხაც 85,900 ლარამდე გაიზარდა. გასულ წელს ამ სამსახურებმა 68,700 ლარი მიიღეს.
ეკონომიკისა და ინფრასტრუქტურის სამსახურის საქმიანობისთვის გამოყოფილია 1,440,600 ლარი. 2012 წლის ბიუჯეტში ამ პუნქტს ერქვა „ინფრასტრუქტურული სამეურნეო საქმიანობა“ და მან ბიუჯეტიდან 821,900 ლარი მიიღო.
41,500 ლარით გაიზარდა სპორტული და კულტურული ღონისძიებებისთვის გამოყოფილი თანხა და 847,000 ლარი შეადგინა.
ჯანდაცვისა და სოციალური პროგრამებისთვის განკუთვნილი თანხაც გაიზარდა შარშანდელი 340,000 ლარიდან 423,200 ლარამდე.
2013 წლის ბიუჯეტში ხარჯების ნაწილში 3 პუნქტი აკლია.
გასულ წელს ეროვნული არქივის დასახმარებლად გამოყოფილი იყო 6,000 ლარი, მაჟორიტარი დეპუტატის ხარჯებისთვის განკუთვნილი იყო 15,000 ლარი, ხოლო შინაგან საქმეთა სამინისტროს ადგილობრივი ორგანოების დაფინანსებისთვის 45,000 ლარი.
[ქრისტინა მარაბიანი, ახალქალაქი]