ბორჯომის ბიუჯეტი 10 მილიონ ლარამდე გაიზარდა

როგორც საფინანსო სამსახურში გვიხსნიან, წარმომადგენლობითი და აღმასრულებელი ორგანოების ხარჯვით ნაწილის გეგმამ 2014 წელს 2.361.100 ლარი შეადგინა. სარეზერვო ფონდი 100.000 ლარით განისაზღვრა. სამხედრო აღრიცხვისა და გაწვევის ხარჯებისთვის 105.000 ლარია გათვალისწინებული. რაც შეეხება სახანძრო-სამაშველო სამსახურის ხარჯებს, ამისთვის 456.230 ლარია გამოყოფილი.

2014 წლის ადგილობრივ ბიუჯეტში მუნიციპალიტეტის ტერიტორიაზე ინფრასტრუქტურის მშენებლობისა და ექსპლუატაციისთვის 3.059.100 ლარია გათვალისწინებული.

ბორჯომის მუნიციპალიტეტის გამგეობის საფინანსო-საბიუჯეტო და სახელმწიფო შესყიდვების სამსახურის უფროსი მაია ბოჭორიშვილი განმარტავს, რომ ამ თანხაში იგულისხმება მხოლოდ ის პროექტები, რომლებიც ადგილობრივი ბიუჯეტიდან ფინანსდება.

რაც შეეხება საგანმანათლებლო ღონისძიებებს, ამისთვის 2014 წლის ბიუჯეტში 1.070.160 ლარია გათვალისწინებული.

„აქ ყველაზე დიდი თანხა, მილიონ 39 ათასი ლარი სკოლამდელი აღზრდის დაწესებულებისთვის არის გათვალისწინებული. აქედან ბაღების რეაბილიტაციისთვის 300 ათასი ლარია გამოყოფილი“, - განმარტავს მაია ბოჭორიშვილი.

სპორტული და კულტურული ღონისძიებებისთვის 2014 წელს 1.500.100 ლარი გამოიყოფა. ხოლო სოციალური და ჯანდაცვის პროგრამების დასაფინანსებლად 1.148.310 ლარი. აქედან სოციალური პროგრამებისთვის 1.051.310, ხოლო დანარჩენი ჯანდაცვის პროგრამებისთვის.

ბორჯომის მუნიციპალიტეტის გამგეობაში განმარტავენ, რომ 2014 წლის ადგილობრივი ბიუჯეტი გასულ წელთან შედარებით 4.300.000 ლარით გაიზარდა. 2013 წელს დამტკიცებული ბიუჯეტი 5.200.000 ლარს შეადგენდა.

[თამარ თოთაძე, ბორჯომი]