პარტიებისთვის პლაკატების გასაკრავი ადგილები თანაბრად გადანაწილდება

ქალაქ ახალციხის ტერიტორიაზე სარჩევნო სააგიტაციო მასალების (პლაკატების) განთავსების შესახებ, ქალაქ ახალციხის საკრებულომ განკარგულება 2016 წლის 17 ივნისს მიიღო. ზუსტად ორი თვის შემდეგ, დღეს, დეპუტატებმა განკარგულებაში ცვლილებები შეიტანეს.

„რეგიონული განვითარებისა და ინფრასტრუქტურის სამინისტროდან მოვიდა წერილი სადაც რეკომენდაციის სახით მოცემულია, რომ კონკრეტულ ადგილებზე გამოყოფილი იყოს ადგილების კონკრეტული რაოდენობა. რათა თანაბრად მოხდეს საარჩევნო სუბიექტების პლაკატების განთავსება და არ იყო ისე, რომ ერთმა განათავსოს ათი პლაკატი და მეორეს არ დარჩეს ერთი ადგილიც კი გასაკვრელად“, – განმარტა სხდომაზე იურიდიულ საკითხთა კომისის თავმჯდომარემ, შალვა გოგოლაძემ.

სამინისტროს რეკომენდაციის თანახმად, ქალაქში წინასწარ გამოყოფილ სპეციალურ ადგილებზე გასაკვრელი პლაკატის ზომა განსაზღვრულია. მისი სიგრძე არა უმეტეს 60 სმ, ხოლო სიგანე 42 სმ უნდა იყოს. აღნიშნული პარამეტრები A2 ფორმატის სააგიტაციო მასალას მოიცავს, თუმცა შესაძლებელია პლაკატი აღნიშნულ ფორმატზე პატარა იყოს.

"სადაც მცირე ფართობია, მაგალითად ავტობუსების მოსაცდელები, 8 კვ. მეტრიანი გამოსაკრავი ადგილები განვსაზღვრეთ, რომ თითო სუბიექტს ჰქონდეს ორი პლაკატის გაკვრის საშუალება. ასეთი მოსაცდელი ოთხი გვაქვს ქალაქში“, – ამბობს შალვა გოგოლაძე.

სააგიტაციო მასალების განთავსების შესახებ, განკარგულებაში შესატან ცვლილებებს მხარი სხდომაზე მყოფმა 11–ვე დეპუტატმა დაუჭირა.

"არაფრით აღარ შეიძლება ახლა ერთმანეთის პლაკატები გადავაკრათ ერთმანეთზე, ან დავხიოთ. იყო ასეთი პერიოდიც, მაგრამ უნდა გავიზარდოთ. საკანონმდებლო დონეზე მაინც უნდა იყოს ეს მითითებული, რომ ყველა პარტიას უნდა ჰქონდეს თანაბარი უფლება. ვისურვებდი, რომ სიტყვა სიტყვად არ დარჩეს და რაც ვთქვით, გაკეთდეს“ – განმარტავს ქალაქ ახალციხის საკრებულოს დეპუტატი "ნაციონალური მოძრობიდან“ მალხაზ გიქოშვილი.

[თაკო ფეიქრიშვილი, ახალციხე]