ახალციხეში საარჩევნო მასალების განთავსების ადგილები განსაზღვრეს

ახალციხის საკრებულო საარჩევნო სუბიექტებს პლაკატების გაკვრის ნებართვას მუნიციპალიტეტის საკუთრებაში არსებულ შემდეგ შენობა–ნაგებობებზე აძლევს:

1. შალვა ახალციხელის სახელობის ტაძრის გარშემო არსებული მესერი (9 აპრილისა და რუსთაველის ქუჩის კვეთა);
2. 9 აპრილის ქუჩაზე მდებარე, მშენებარე ცხრა სართულიანი საცხოვრებელი კორპუსის წინ არსებული მესერი (9 აპრილისა და რუსთაველის ქუჩის კვეთა);
3. საფარის შესახვევთან არსებული კედელი;
4. დიდიმამიშვილის ქუჩასა და ხუთსართულიან კორპუსს ( დიდიმამიშვილის N1) შორის არსებული კედელი;
5. ყოფილი სასაზღვროს ნაწილის კედელი;
6. ქალაქში არსებული ავტობუსის გაჩერებები;
7. ხარისჭირაშვილის ქუჩაზე, რაბათში შესასვლელი ხიდის მარცხენა მხარეს არსებული კედელი;
8. რაბათში, ყაზბეგის ქუჩაზე არსებული მინი მოედნის კედელი;
9. ავტოსერვისის ცენტრის „თეგეტა მოტორსის“ სიახლოვეს მდებარე ახალი სარკინიგზო ხიდის კედელი;

გარდა აღნიშნულისა, გამოყოფილია ადგილები გადასაჭიმი ბანერებისთვის.

მათი განთავსება შესაძლებელია: თამარაშვილის ქუჩაზე (ყოფილი პურკომბინატისა და სახანძრო–სამაშველო სამსახურის შენობის მიმდებარე ტერიტორიაზე), რუსთაველის ქუჩაზე (უნივერვსიტეტის მიმდებარე, მეხუთე სკოლის მიმდებარე, ღრელის ასახვევის მიმდებარე ტერიტორიებზე), ასევე ასპინძის ქუჩის დასაწყისში.

საკრებულოს განკარგულებაში წერია, რომ საარჩევნო სუბიექტების მიერ გასაკრავი საარჩევნო პლაკატების მაქსიმალური რაოდენობა, ერთ საარჩევნო სუბიექტზე განისაზღვროს 1 ცალით ( პლაკატი შემდეგი ზომებით: სიგრძე არაუმეტეს, 60 სმ., სიგანე არაუმეტეს 42სმ, A2 ფორმატით).

შესაძლებელია მსურველმა სააგიტაციო მასალები გამოფინოს კერძო მფლობელობაში არსებულ შენობა–ნაგებობებსა და სხვა ობიექტებზეც, მათი მფლობელების ნებართვის საფუძველზე.

ქალაქ ახალციხის საკრებულოს განკარგულებაში არ წერია, არჩევნების დასრულების შემდეგ რა სანქციები ეკისრება საარჩევნო სუბიექტს მათ მიერევე გაკრული პლაკეტების არჩამოხსნის შემთხვევაში. როგორც საკრებულოში განგვიმარტეს, ამას კანონი არეგულირებს.

საიას გორის ოფისის ხელმძღვანელის ქეთი ბებიაშვილის განმარტებით, პლაკატების არჩამოხსნის საკითხი კანონმდებლობით ცალკე რეგულირდება, თუმცა, შეეძლოთ ეს გაეთვალისწინებინათ.

„მუნიციპალიტეტის ზედამხედველობის სამსახური განახორციელებს დაჯარიმებას, ადმინისტრაციული სამართალდაღვევის ოქმის შედეგენას“, – აცხადებს ქეთი ბებიაშვილი.

მიუხედავად კანონისა, რომელიც საარჩევნო სუბიექტებს პლაკატების ჩამოხსნას ავალდებულებს, ხშირ შემთხვევაში ამა თუ იმ პოლიტიკური პარტიის პლაკატები წლების განმავლობაში რჩება გაკრული ქალაქის სხვადასხვა ადგილზე და ამახინჯებს ქალაქის იერსახეს.

„ეს არის პოლიტიკური ნება. არასდროს, არცერთი ხელისუფლება არ აჯარიმებს პოლიტიკურ პარტიებს პლაკატების არჩამოხსნის შემთხვევაში. თუმცა არსებობს რეგულაციები. ეს დარღვევა არის იერსახის დამახინჯება, რომელიც მინიმალურ თანხას, 50 ლარით დაჯარიმებას ითვალისწინებს და სამწუხაროდ, ხშირად ამას პოლიტიკური პარტიები არ ითვალისწინებენ“, – ამბობს ქეთი ბებიაშვილი.

[თინათინ ზაზაძე, ახალციხე]