საუბნო კომისიაში წევრობის მსურველთა რეგისტრაციის ვადა იწურება

საუბნო სარჩევნო კომისიების დაკომპლექტების მიზნით, წევრობის მსურველთა შესარჩევი კონკურსი ცესკომ 3 აგვისტოს გამოაცხადა. კონკურსში მონაწილეობის მსურველებისთვის განცხადების შეტანის ვადა ხვალ, 17 აგვისტოს იწურება.

იმისათვის, რომ პირი 8 ოქტომბრის საპარლამენტო არჩევნებზე საუბნო კომისიის შემადგენლობაში იყოს, შესაბამის საოლქო საარჩევნო კომისიას განცხადებით უნდა მიმართოს. დოკუმენტში მითითებული უნდა იყოს შემდეგი ინფორმაცია:

• კანდიდატის სახელი და გვარი;
• იმ საარჩევნო უბნის ნომერი და დასახელება, სადაც მას სურს წევრობა;
• საკონტაქტო მისამართი და ტელეფონის ნომერი.

ცენტრალური საარჩევნო კომისიის #230/2016 განკარგულების მიხედვით, განცახადებას თან უნდა დაერთოს:

• საქართველოს მოქალაქის პირადობის (რეგისტრაციის) მოწმობის ქსეროასლი;
• არჩევნებში მონაწილეობის გამოცდილების აღწერა (თუ აქვს ასეთი გამოცდილება).

განმცხადებელმა საკონკურსო დოკუმენტაცია საოლქო საარჩევნო კომისიაში პირადად უნდა წარადგინოს. თუ წარდგენილი საკონკურსო დოკუმენტაცია არ შეესაბამება განკარგულებით დადგენილ მოთხოვნებს, საოლქო საარჩევნო კომისია დაუყოვნებლივ (დოკუმენტაციის მიღებისას) აცნობებს მას, შეუსაბამობის მითითებით. შესწორებული საკონკურსო დოკუმენტაცია კომისიას 1 დღეში უნდა დაუბრუნდეს. რეგისტრაციის ვადის გასვლის შემდეგ წარმოდგენილ საკონკურსო დოკუმენტაციას კომისია არ განიხილავს.

წევრობის მსურველმა საკონკურსო დოკუმენტაცია მხოლოდ ერთი საუბნო საარჩევნო კომისიის წევრობაზე უნდა შეიტანოს, თუმცა საოლქო საარჩევნო კომისიის მიერ საკონკურსო დოკუმენტაციის მიღების ვადის განმავლობაში, მას უფლება აქვს გამოითხოვოს საკონკურსო დოკუმენტაცია ან შეცვალოს საკონკურსო ადგილი (საარჩევნო უბნის ნომერი და დასახელება) შესაბამისი განცხადებით.

[თაკო ფეიქრიშვილი, ახალციხე]