ჟვანიას სკოლის პროგრამების პრეზენტაცია ახალციხეში

შეხვედრა,სამცხე–ჯავახეთის სამხარეო ადმინისტრაციაში შედგა. მას სამცხე – ჯავახეთის გუბერნატორი აკაკი მაჭუტაძე და მუნიციპალიტეტების გამგებლები, მოადგილეები და საკრებულოს თავმჯდომარეები ესწრებოდნენ.

ზურაბ ჟვანის სახელობის სახელმწიფო ადმინისტრირების სკოლის დირექტორმა ქეთევან ჯაყელმა 2014 წელს სკოლაში განხორციელებულ სამუშაოებზე და 2015 წელს დაგეგმილ პროგრამებზე ისაუბრა.

„მივაწოდეთ ინფორმაცია და ჩვენის მხრივ, გვინდა რომ მათაც მოგვაწოდონ ინფორმაცია რეგიონში არსებულ პრობლემებზე, რასაც შემდგომში სასწავლო პროგრამებს მოვარგებთ“,– ამბობს ქეთევან ჯაყელი და აქვე ამატებს, რომ სამცხე – ჯავახეთი სკოლისთვის ერთ – ერთი პრიორიტეტული სამიზნე რეგიონია: „უმცირესობებით დასახლებული რეგიონები სკოლისთვის ერთ – ერთი პრიორიტეტია. უმცირესობებს ვეხმარებით როგორც პროფესიულ განვითარებაში, შესყიდვებში, ფინანსურ მენეჯმენტში, საჯარო მართვასა და საქმის წარმოებაში, ასევე ვასწავლით სახელმწიფო ენას“.

ახალქალაქის მუნიციპალიტეტში, რომ სახელმწიფო ენის სწავლება წარმატებულად მიმდინაროებს, ახალაქლაქის მუნიციპალიტეტის გამგებელმა ედუარდ აღასარიანმა ისაუბრა: „ძალიან ძნელია, თანამშრომლების გაშვება ქუთაისში ერთ ან ორი თვით, ზურაბ ჟვანის სახელობის სკოლამ კი აიღო ვალდებულება და მოგვცა საშუალება, რომ საჯარო მოხელეების გადამზადება ადგილზევე მოხდეს. ქართული ენის სწავლება ძალიან მნიშვნელოვანია ჩვენი რაიონისთვის“.

ზურაბ ჟვანის სახელობის სახელმწიფო ადმინისტრირების სკოლას, რომელიც ქუთაისში მდებარეობს, რვა რეგიონული სასწავლო ცენტრი აქვს. აქედან ორი სამცხე – ჯავახეთში მდებარეობს, ხუთი ქვემო ქართლში და ერთი კახეთში. მომავალ წელს კიდევ ორი რეგიონული სასწავლო ცენტრის გახსნა იგეგმება.

[მანანა სარაშვილი, ახალციხე]