სადავო ცვლილება ბიუჯეტში – ოპოზიცია მერიის ქმედებაში ამომრჩეველების მოსყიდვის ნიშებს ამჩნევს

ქალაქ ახალციხის მუნიციპალიტეტის საკრებულომ, დღეს, 5 აგვისტოს, რიგგარეშე სხდომა ჩაატარა. დეპუტატებმა ბიუჯეტში შესატან ცვლილებებს უყარეს კენჭი. ცვლილებების მიხედვით, ახალციხის მერიის ბიუჯეტიდან სომხური ეკლესიის სახურავის რეაბილიტაციისთვის 10.000 ლარი გამოიყოფა. გადაწყვეტილებას მხარი არ დაუჭირეს უმცირესობის დეპუტატებმა.

„წინასაარჩევნოდ თანხებით მანიპულირება არაფრით არ შეიძლება. მაინც და მაინც ორი თვით ადრე რატომ მოინდომეს ეკლესიის სახურავის გაკეთება, როცა შეიძლებოდა ოთხი თვით ადრე, ან თუნდაც შარშან გაკეთებულიყო?! არჩევნების შემდეგ გაკეთდეს და 10 კი არა, 40 ათასი დაიხარჯოს, ჩვენ ამის წინააღმდეგი არ ვართ“, – ამბობს ფრაქცია „ერთიანი ნაციონალური მოძრაობის“ თავმჯდომარე მალხაზ გიქოშვილი.

საკრებულოს თავმჯდომარე დავით ლომიძე აცხადებს, რომ ეკლესიამ საკრებულოს დიდი ხნის წინ მიმართა და ეს საარჩევნო პროცესთან კავშირში არ არის.

„ეკლესიაში სტიქიის დროს წყალი ჩავიდა და ეს პროცესი ამანაც დააჩქარა. მოსახლეობა თავისი ხარჯებით აკეთებს, ჩვენ თანამონაწილეობას ვღებულობთ 10.000 ლარის ოდენობით“, – განმარტავს დავით ლომიძე.

წინასაარჩევნო პროცესთან კავშირს გამორიცხავს საკრებულოს დეპუტატი „ქართული ოცნებიდან“ ამბარცუმ ბაბოიანი. მისი თქმით მოსახლეობამ და სამღვდელოებამ სახურავის რეაბილიტაცია თავისი ხარჯებით უკვე დაიწყო: „სახურავი ინგრევა და არ უნდა გავაკეთოთ? სამღვდელოებამ მერიისგან თანაფინანსება ითხოვა“.

საკრებულოს უმცირესობის დეპუტატების გადაწტყვეტილება უკვირის მერის მოადგილეს ზაზა გელაძეს, რომელიც დღევანდელ საკრებულოს სხდომას ესწრებოდა.

„რატომ გაქვთ ეს პრობლემა? ვაკეთებთ რატომ აკეთებთო, არ ვაკეთებთ და რატომ არ აკეთებთო. რატომ წინა საარჩევნოდ? იმიტომ, რომ ხვალ და ზეგ ბიუჯეტში ცვლილებას ვერ შევიტანთ. ყოველ წელს არჩევნებია და ჩვენ აღარაფერი არ გავაკეთოთ?“ – კითხულობს იგი.

საქართველოს ახალგაზრდა იურისტთა ასოციაციის გორის ოფისის წარმომადგენელი ქეთი ბებიაშვილი ამბობს, რომ ახალციხის საკრებულოს ქმედებაში კანონდარღვევა არ არის თუმცა, კითხვები ჩნდება: "შესაძლებელია ეს იყოს, სომეხი ეროვნების ელექტორატის გულის მოგების მცდელლობა. მერიას თავისუფლად შეეძლო, ეს თანხა რამდენიმე თვის წინ გამოეყო".



[თინათინ ზაზაძე, ახალციხე]