პედაგოგთა გამოცდების ტესტებში ცვლილებები შევიდა

მასწავლებელთა სერთიფიცირების ახალ სისტემაზე გადასვლასთან დაკავშირებით, საგნის სწავლების მეთოდიკა საგნობრივი ტესტებით აღარ შემოწმდება.

ქართულ ენასა და ლიტერატურაში ტესტის ჯამური ქულა 80-ის ნაცვლად 70 იქნება. ტესტის პირველ ნაწილს (ქართული ენა) 3 ქულა მოაკლდა, შესაბამისად, ამ ნაწილის მაქსიმალური ქულა 35 იქნება.

ტესტის მეორე ნაწილი (ქართული ლიტერატურა), რომელიც მხოლოდ არჩევითი კითხვებისგან შედეგება, 20 ქულიანი იქნება (წინა წლებში ის 12-ქულიანი იყო).

ამას მოსდევს ტესტის მესამე ნაწილი (წაკითხულის გააზრება), რომელიც მოიცავს არასაპროგრამო მხატვრულ ტექსტსა და 11 დავალებას. აქედან 10 ერთქულიანი არჩევითი კითხვაა, მე-11 დავალება კი 5-ქულიანი ღია კითხვა, რომელიც მოითხოვს მსჯელობას ამ მხატვრული ტექსტის მთავარი სათქმელისა და მხატვრულ-გამომსახველობითი საშუალებების შესახებ.

ახალი ფორმატით ჩააბარებენ საგნობრივ ტესტს უცხოური ენების პრაქტიკოსი მასწავლებლები. გამოცდა კითხვის, მოსმენის, წერისა და ლაპარაკის დავალებებისაგან შედგება.

გასულ წლებთან შედარებით ტესტში რამოდენიმე სიახლეა, კერძოდ:
1. ამოღებულია მეთოდიკის საკითხები;
2. დამატებულია წერის დავალება, რომელიც გულისხმობს მოცემული ინფორმაციის გათვალისწინებით სამოტივაციო წერილის დაწერას;
3. კითხვის ზოგიერთ დავალებაში გაზრდილია ან შემცირებულია საკითხების რაოდენობა;
4. ტესტის ჯამური მაქსიმალური ქულა არის 90; შეცვლილია როგორც მთლიანი ტესტის
გამსვლელი ქულა, ისე შიდა ბარიერები ტესტის კითხვის და წერის ნაწილებში.

მინიმალური ზღვრები და გამსვლელი ქულები:

მთლიანი ტესტი – მაქსიმალური ქულა 90, გამსვლელი ქულა – 55;
მოსმენის ნაწილი – მაქსიმალური ქულა –16, გამსვლელი ქულა – 6;
კითხვის ნაწილი – მაქსიმალური ქულა – 36, გამსვლელი ქულა – 12;
წერის ნაწილი – მაქსიმალური ქულა – 22, გამსვლელი ქულა – 8;
ლაპარაკის ნაწილი – მაქსიმალური ქულა – 16, გამსვლელი ქულა – 6;

პრაქტიკოსი მასწავლებლებისთვის პროფესიული გამოცდები 2016 წლის ივლისის თვეში გაიმართება.

[თაკო ფეიქრიშვილი, ახალციხე]