სტიქია ახალციხეში – ბაზარში რამდენიმე ადგილზე ჭერი ჩაინგრა

ახალციხის ბაზრის შენობაში წყალმა სახურავიდან გაჟონა. მეორე სართულზე განთავსებული ავეჯის მაღაზიების ჭერი რამდენიმე ადგილზე ჩამოინგრა და თან საშენი მასალა ჩამოიტანა. დასველდა რბილი ავეჯი, ხალიჩები, ხის მაგიდები და სკამები.

წყალმა გაჟონა პირველ სართულზეც. მოვაჭრეებს გასაყიდად გამზადებული ტანისამოსი და სხვადასხვა ნივთები დაუსველდათ.

"წყალში ვცურავდით, როგორც გარეთ, ისე აქ წვიმდა. ერთმანეთს მივეხმარეთ, რომ გასაყიდი საქონელი გადაგვერჩინა. ჯერ ზედა სართული დატბორა, მერე წყალი დაბლა ჩამოვიდა. ეს პირველი შემთხვევა იყო. 3–4 წლის წინ მიწისძვრის დროს შენობის კედლები დაიბზარა და ახლა წყალმა ამ ადგილებში გამოჟონა“– ამბობს ზინაიდა ნატრიაშვილი.














შეგახსენებთ, დღეს, 3 აგვისტოს, ქალაქ ახალციხეში ძლიერი სეტყვა დაახლოებით 15 წუთის განმავლობაში გრძელდებოდა. დაზიანდა კოსტავას, თამარაშვილის, ხანძთელისა და მიქუტიშვილის ქუჩები.. [/url] მესხეთის ქუჩაზე საცხოვრებელი სახლის ეზოს კედელი ჩამოეშალა. კოსტავას ქუჩაზე კი წვიმა ოთახებში ჩავიდა. სტიქიისგან დაზარლდა მაღაზია "შოშიაც".

900–მდე აბონენტი უშუქოდაა.3 აგვისტოს, ქალაქ ახალციხეში მოსულმა ძლიერმა სეტყვამ ხეხილიც გაანადგურა.

ახალციხის ქუჩებში ამ დრომდე მუშაობს სამაშველო სამსახური. მაშველები ადგილობრივების დატბორილი სარდაფებიდან და ფარეხებიდან წყალს ტუმბავენ.

მერია ზარალის შესწავლას ხვალ დაიწყებს.

დღევანდელი სტიქია სოციალური ქსელის განხილვის თემაა.

[თაკო ფეიქრიშვილი, ახალციხე]