გზა ყველას, ორი ოჯახის გარდა – უკმაყოფილება ხმალაძის ქუჩაზე

ლელა ზედგინიძე, ახალციხეში, რაბათის უბანში, ხმალაძის ქუჩის ბოლოში ცხოვრობს. მალე მათ ქუჩაზე ახალი სანიაღვრე არხები და ასფალტის საფარი იქნება, თუმცა, არა ლეილას სახლამდე. ლეილას სახლში შესასვლელად ასფალტიდან ისევ დანგრეულ გზაზე მოუწევს გადასვლა.

„ორი ოჯახი ვართ დარჩენილი და მაგიტომ არ გვიკეთებენ, თორემ მერიისთვის რა გახდა 100 მეტრი. ნახეთ რა გზაა, ძლივს მივდივართ სახლამდე. წერილიც მივწერეთ მერიას, მაგრამ პასუხიც კი არ გვაღირსეს“, – ამბობს ლელა ზედგინიძე.

ახალციხის მერიაში ამბობენ, რომ ხმალაძის ქუჩის ბოლოში მცირე მონაკვეთი მართლაც რჩება და ამას რამდენიმე არგუმენტით ხსნიან. როგორც მერიაში განმარტავენ, ეს რთული მონაკვეთია, იქ არსებული ხიდის გამო და რეაბილიტაციაც ძვირი ჯდება.

„აქ არის პრობლემა ხიდის. შესაძლებელია, რომ შემოვლითი გზით მოვაგვაროთ პრობლემა. როგორც კი პროექტები დასრულდება, დანაზოგებით ამასაც გავაკეთებთ“, – ამბობს ახალციხის მერი გიორგი კოპაძე.

მერიის ინფრასტრუქტურის სამსახურის უფროსის გელვასი გელაძის განმარტებით, ამ მონაკვეთის რეაბილიტაციას ზედაპირული გათვლებით 21.000 ლარამდე სჭირდება. ამ გზის შეკეთებას გელაძეც სამომავლოდ განიხილავს.

ახალციხეში, რაბათის უბანში, ათონელისა და ხმალაძის ქუჩების გზის მოასფალტების სარეაბილიტაციო და სანიაღვრე არხების მოწყობის სამუშაოებისთვის, ახალციხის მერიამ ტენდერი 2016 წლის 2 თებერვალს, 367,242 ლარზე გამოაცხადა. სატენდერო დოკუმენტაციის მიხედვით, ხმალაძის ქუჩაზე შეკეთებას გზის 590–მეტრიანი მონაკვეთი ექვემდებარება, საერთო ფართით 2665 კვადრატული მეტრი.
ტენდერი, ამავე ოდენობის თანხით, შპს „არალმა“ მოიგო. მერიამ კომპანიასთან ხელშეკრულება 25 აპრილს გააფორმა.

შპს „არალის“ დირექტორი ოთარ თათეშვილი ამბობს, რომ ხმალაძის ქუჩის ბოლოში გზის მცირე მონაკვეთის შეკეთება პროექტით გათვალისწინებული ნამდვილად არ ყოფილა.

„ფიზიკურად ვერ გაკეთდება მანდ გზა. იყო სურვილი, რომ რაც შეიძლება მეტზე გადავსულიყავით, მაგრამ ტექნიკაც ვერ გადაგვყავს. საუბარი ამ მონაკვეთზე ნამდვილად იყო, მერიის წარმოამდგენლებს შეხვდნენ ადგილობრივები. მაგრამ, მაგის გაკეთება დიდ ხარჯებს უკავშირდება და მერია ვეღარ გაწვდა. რაც პროექტითაა გათვალისწინებული, ყველაფერი კეთდება“, – განმარტავენ კომპანიაში.

ხმალაძის ქუჩაზე გზის შეკეთების სამუშაოების 2016 წლის 26 სექტემბერს უნდა დასრულდეს. უგზოდ დარჩენილ ორ ოჯახს ლოდინის მეტი არაფერი დარჩენია – მერიაში ირწმუნებიან, რომ ამ მონკვეთს აუცილებლად შეაკეთებენ.

[თინათინ ზაზაძე, ახალციხე]