მარტოხელა პენსიონერი: „პროდუქტს პლედში გამოვახვევ და სახლამდე თრევით მიმაქვს“

80 წლის ვალენტინე კაპანაძე 65 წელია ჯაყელის N55–ში ცხოვრობს. უბანი, რომელშიც მისი სახლი მდებარეობს ჭყონდიდელის ქუჩის გაგრძელებაა. შესაბამისად, მის სახლამდე მისასვლელი გზა ჭყონდიდელის ქუჩაზე გადის. ამ ქუჩის დასასრულიდან კაპანაძის სახლამდე სულ 60 მეტრია.

„ერთი თვეა ჭყონდიდელის ქუჩაზე ასფალტს აგებენ და ტექნიკა მუშაობს, მაგრამ გზის გაკეთებას ჩემ სახლამდე არ გეგმავენ, ერთ–ერთი მოსახლის სახლთან უკვე შეჩერდნენ, ხრეშიც იქამდე დაყარეს“, – ამბობს კაპანაძე.

გარდა ჭყონდიდელის ქუჩისა, ჯაყელის N55–მდე მხოლოდ საცალფეხო ბილიკი მიდის, თუმცა ეს გზა იმდენად დანგრეული და ავარიულია, რომ განსაკუთრებით ხანდაზმულისთვის აქ გადაადგილება სახიფათოა.

„ამ ბილიკით ვერ ამოვდივარ, წვიმიან და თოვლიან ამინდში ხომ საერთოდ შეუძლებელია, ფორთხვით მოვდივარ–ხოლმე სახლამდე. ყველა გასვლა–გამოსვლაზე დასახმარებლად მეზობლებს ხომარ შევაწუხებ“, – ამბობს კაპანაძე.

უგზოობის გამო მის სახლამდე ვერც მანქანა მიდის.

„ბაზრიდან პროდუქტი თუ მომაქვს ტაქსით მოვდივარ ხოლმე, მაგრამ სახალმდე მანქანას ვერ მივყავარ. ჭყონდიდელის ქუჩაზე აჩერებს და იქ ჩამოვდივარ. ერთი პატარა პლედი მაქვს, ამ პროდუქტს იმაში ჩავყრი–ხოლმე და სახლამდე ასე თრევა–თრევით მომაქვს“, – გვიყვება კაპანაძე.

როგორც თავად აცხადებს, ადგილობრივ ხელისუფლებას დახმარების თხოვნით არა ერთხელ მიმართა, ბოლოს კი განცხადება მერიში 3 ივლისს დაწერა. თუმცა, პასუხი გაკეთდება თუ არა მის სახლამდე მიმსასვლელი გზა, ამ დრომდე არ მიუღია: „ბევრჯერ მივაკითხე მერიაში და ბევრჯერაც დავურეკე. ჯერ მითხრეს გავაკეთებთო თუმცა შემდეგ ასე თქვეს ისეთი გზაა მანდ ტრაქტორი ვერ ამოვაო“.

ჭყონდიდელის ქუჩაზე ასფალტს ტენდერში გამარჯვებული კომპანია შპს „მესხეთავტოგზა“ აგებს. მან მერიის მიერ გამოცხადებული ტენდერი 131 000 ლარით მოიგო. როგორც აღნიშნული კომპანიის დირექტორი თამაზ პეტრიაშვილი ამბობს, ის მხოლოდ იმას აკეთებს, რაც პროექტით აქვს განსაზღვრული: „იმას რაც პროექტში წერია ვერ გადავუხვევთ. ყველაფერი მხოლოდ პროექტის მიხედვით უნდა შესრულდეს“.

„სამხრეთის კარიბჭეს“ ახალციხის მერიაშიც იგივე განუცხადეს: „იმ მონკავეთის გაკეთება რასაც ეს ქალბატონი ითხოვს, ტენდერით გათვალისწინებული არაა“.

[მარიამ ბარძიმაძე, ახალციხე]