ახალციხეში მასწავლებელთა შეფასების სქემა განიხილეს

ფორუმი, რომელშიც პროგრამის პარტნიორი სკოლებიდან 20 მასწავლებელი მონაწილეობდა, სამოქალაქო განათლების პროგრამის ფარგლებში მოეწყო. ვინაიდან ფორუმში ქართული და სომხური საჯარო სკოლების მასწავლებლები მონაწილეობდნენ, დისკუსია ორ ენაზე წარიმართა.

ფორუმის მონაწილეებს, „მასწავლებელთა საქმიანობის დაწყების, პროფესიული განვითარებისა და კარიერული წინსვლის სქემა“, ივანე ჯავახიშვილის სახელობის თბილისის სახელმწიფო უნივერსიტეტის ასცირებულმა პროფესორმა, ევროპული სკოლის მათემატიკის კათედრის გამგემ პეტრე ბაბილუამ წარუდგინა. განიხილეს სქემის მიზანი, სქემის რეგულირების სფეროები, მასწვლებლის სქემაში გადანაწილება, ასევე მოქმედი მასწავლებლების მიერ სქემით განსაზღვრული სტატუსების მიღწევის გზები.

პრეზენტაციის შემდეგ გაიმართა დისკუსია და კონკრეტული სიტუაციების განხილვა.

„პედაგოგებმა ინფორმაცია მიიღეს ახალი სქემის შესახებ, რამდენი კრედიტ ქულა უნდა დააგროვონ პრაქტიკოსი მასწავლებლის სტატუსის შესანარჩუნებლად. პრაქტიკოსი მასწავლებლიდან უფროსი მასწავლებლის სტატუსის მისაღებად, შესანარჩუნებლად და წამყავნი მასწავლებლის სტატუსის მოსაპოვებლად. ასევე მიიღეს ინფორმაცია სახელფასო პოლიტიკის შესახებ“, – განმარტავს სამცხე-ჯავახეთის პედაგოგთა ფორუმის კოორდინატორი ნინო ნადირაძე.

სამოქალაქო განათლების პედაგოგებისათვის მრგვალი მაგიდა წელიწადში ერთხელ, საქართველოს მასშტაბით, ყველა რეგიონში ეწყობა.

[ნინო ნარიმანიშვილი, ახალციხე]