‘ოცნების’ შეხვედრის გამო საქალაქო ტრანსპორტმა მოძრაობის მარშრუტი შეცვლა

საქალაქო ტრანსპორტი, ახალციხეში, თამარაშვილის ქუჩიდან, ავტოსადგურიდან, უნივერსიტეტისა და საავადმყოფოები მიმართულებით მოძრაობს. სხვა დღეებში, ტრანსპორტი, ამ მარშრუტს, ყოველ ნახევარ საათში, ქალაქის ცენტრის გავლით გადის, დღეს კი მისი მიმართულება შეცვლილია.

დილიდან, რუსთაველისა და კოსტავას ქუჩების გადაკეტვის გამო, საქალაქო ტრანსპორტი ავტოსადგურიდან დანიშნულების ობიექტებამდე, ქალაქის გარეუბნიდან, ბაზრის მიმართულებიდან დადის. ეს კი ნიშნავს, რომ თუ ვინმეს არა უნივერსიტეტში ან საავადმოფოში, არამედ, მაგალითად, ქალაქის ცენტრში სურს მოხვედრა, დღეს გაჩერებებზე საქალაქო ტრანსპორტს არ უნდა დაელოდოს.

ასევე, თუ ვინმეს ქალაქის ცენტრიდან სურს საავადმყოფოში წასვლა, საქალაქო ავტობუსში მოსახვედრად ის ავტოსადგურის ტერიტორიაზე უნდა ჩავიდეს.

შეგახსენებთ, რომ დღეს, 28 სექტემბერს „ქართული ოცნება“ ახალციხეში მერობის კანდიდატებს წარადგენს, ამიტომ ღონისძიების დაწყებამდე 10 საათით ადრე, ქალაქის ცენტრთან დამაკავშირებელი ყველა ქუჩა გადაიკეტა. დილიდან ჩიხებში საცობებია და ადგილობრივებს ცენტრთან დაკავშირება, შემოვლითი გზებით უწევთ.

[sknews.ge]