აშხენ სიმონიანიახალციხეში, სოფელ წინუბანში მცხოვრებ აშხენ სიმონიანს სახლიდან დაახლოებით 5 ათასი დოლარის ოქრო და 100 ლარი მოჰპარეს.
შემთხვევა 14 ივლისს, დღის პირველ ნახევარში მოხდა.
„დილით სახლიდან ყველა გავედით, მხოლოდ 91 წლის მოხუცი დარჩა. შინ რომ დავბრუნდი, კარი ფეხით იყო შემონგრეული, დარტყმის გამო ‘სერვანდიდან’ ნივთები ძირს იყო გადმოყრილი. კარადიდან კი ფული და ოქრო დამხვდა წაღებული“, – გვიყვება სიმონიანი და ამატებს, რომ იმან, ვინც მისი ძვირფასეულობა წაიღო, იცოდა სად რა იდო, რადგან სახლში ქურდს ნივთები ნაძებნი არ ჰქონდა.
სიმონიანების სახლის ქურდობა, როგორც ადგილობრივები გვიყვებიან, ივნისსა და ივლისში, მეზობელ სოფლებში მომხდარ ქურდობებს შორის ბოლო ფაქტი იყო. მანამდე კი სოფელ წყალთბილაში ორ მაღაზია, სოფელ ჯულღაში კი ორი სახლი გაიქურდა.
„წყალთბილაში მაღაზიები ღამით გაქურდეს, ჯულღაში სახლები ერთსა და იმავე დროს, დღისით. მაშინ სოფელში მიცვალებული იყო, ხალხი სასაფლაოზე იყო და დრო იხელთეს“, – ამბობს ახალციხის მუნიციპალიტეტის გამგებლის წარმომადგენელი წყალთბილის ტერიტორიულ ორგანოში პეტროს ვართანიანი.
მისი თქმით, ჯულღაში გაქურდული ერთი სახლიდან 400 დოლარი და 300 ლარი, მეორე სახლიდან კი 700 დოლარი და 450 ლარი წაიღეს: „ორივე სახლში მოხუცები ცხოვრობენ. რაც შეეხება მაღაზიებს, ძირითადად სიგარეტი და „კალბასები“ წაიღეს, ფული არ იყო ბევრი მაღაზიებში, ჯამში ორივედან 500–600 ლარია წაღებული. ბოლოს წინუბნიდან კი ბევრი ოქრო გაიტანეს“.
წინუბანში მომხდარი ფაქტის შემდეგ, როგორც აქ მცხოვრები ივან აკოფიანი ამბობს, სოფლიდან სხვადასხვა დროს პოლიციაში 5–6 ბიჭი წაიყვანეს. მათ შორის ორი, 26 წლის რუბიკ ჩახოიანი და 20 წლის გრიგოლ აკოფიანი პოლიციელებს ცემაში ადანაშაულებენ.
რუბიკ ჩახოიანი„შუადღეს წამიყვანეს სოფლიდან. პოლიციის შენობაში მესამე სართულზე მიმიყვანეს. მაძალებდნენ, თქვი, რომ შენ ხარ დამნაშავე, თუ იტყვი, პრობლემები არ გექნება, თუ არადა, ჩვენ შეგიქმნით პრობლემებსო. ლაპარაკის დროს ქვედა ყბაზე მირტყამდნენ მუშტით და ხელით მცემდნენ ზურგზე“, – გვიყვება ჩახოიანი.
მისი თქმით, იმას ვინც მას ურტყამდა, პოლიციის ფორმა არ ეცვა: „შავი მაიკით იყო. პოლიციაში დაახლოებით 15–20 წუთი გამაჩერეს“.
გრიგოლ აკოფიანიჩახოიანისგან განსხვავებით, ახალციხის რაიონული სამმართველოს შენობაში ექვს საათს დააყოვნეს მის მეზობლად მცხოვრები გრიგოლ აკოფიანი.
„შუადღის ორიდან საღამოს რვა საათამდე, „სმარტთან“ რომ პოლიციაა, იქ ვიყავი. მეუბნებოდნენ, თქვი, რომ ეს ქურდობა შენ ჩაიდინეო. რომ არ ვამბობდი, ნიკაპში და თავზე მირტყამდნენ. მე ქურდი არ ვარ, არაფერი მომიპარავს“, – ამბობს აკოფიანი.
მისი თქმით, იგი პოლიციიდან იმ პირობით გამოუშვეს, რომ ერთ–ერთ პოლიციელს ყოველდღე დაურეკავს და სოფელში მომხდარი ამბების შესახებ მოუყვება, თუ ასე არ იქნება, პრობლემები შეექმნება.
„ამ ნომერზე ვრეკავ ხოლმე, გოგიტა ქვია“, – გვიჩვენებს ფურცელზე დაწერილ ტელეფონის ნომერს აკოფიანი, – „მაგრამ მხოლოდ იმას ვეუბნები, სად ვარ და რას ვაკეთებ, არ მინდა პრობლემები შემექმნას“.
აღნიშნულ ნომერზე „სამხრეთის კარიბჭეს“ ვინმე გოგიტამ უპასუხა. მან ჯერ აკოფიანთან რაიმე კავშირი კატეგორიულად უარყო, შემდეგ კი განაცხადა, რომ სამსახურეობრივ საქმეზე თუ ვის რაზე ელაპარაკება, ჩვენ ვერ მოგვიყვება და ტელეფონი გაგვითიშა.
შინაგან საქმეთა სამინისტროში წინუბანში მცხოვრებლებზე რაიმე ზეწოლის ფაქტს კატეგორიულად უარყოფენ: „თუ ვინმეს ასეთი პრეტენზია გააჩნია, მიმართოს შსს–ს გენინსპექციას“.
რაც შეეხება ქურდობის ფაქტებს, უწყებაში ხუთი შემთხვევიდან მხოლოდ ორს გვიდასტურებენ: „სოფელ წყალთბილაში გაქურდეს მაღაზია და სოფელ წინუბანში სახლი. ორივე ფაქტზე ძიება სსკ–ის 177–ე მუხლით მიმდინარეობს, რაც ქურდობას გულისხმობს“.
[თამუნა უჩიძე, ახალციხე]