ახალციხეში საცხოვრებელი სახლი გაქურდეს

ახალციხეში საკუთარი სახლი გაქურდეს. ქურდებმა ბინიდან ოქრო, ფული და სხვა ნივთები წაიღეს. მომხდარს შსს ქურდობის მუხლით იძიებს.

დაზარალებულები ფიქრობენ, რომ შემთხვევა, 7 ან 8 მარტს ღამით მოხდა, რადგან ამ დღეებში სახლში არავინ იმყოფებოდა. ქურდებმა ბინაში სავარაუდოდ ფანჯრიდან შეაღწიეს. ღია, დაზიანებული ფანჯარა მეზობელმა ცხრა მარტს შენიშნა და ოჯახს დაუკავშირდა.

„7–ში, შუადღეს, თბილისში წავედი, ჩემი ოჯახი იქ ცხოვრობს და 8 მარტი უნდა აღგვენიშნა ერთად. მეზობელმა დამირეკა 9–ში საღამოს, თქვენი სახლის ფანჯარა ღიააო“, – გვიყვება ოჯახის დიასახლისი.

მისი თქმით, იმ ღამესვე ახლობლებს სთხოვა, რომ კარი გაეღოთ და ბინაში შესულიყვნენ: „მთელი სახლი ანგრეული დახვდათ. პოლიცია გამოიძახეს, სამართალდამცავები მაშინვე მივიდნენ, მიიყვანეს ძაღლი, აიღეს ანაბეჭდები და გამოძიება დაიწყეს“.
ოჯახი ბინაში 10 მარტს, დილით დაბრუნდა.

„შვიდი ოთახი გვაქვს და შვიდივე ანგრეული იყო, საწოლებიც კი გადმოეყარათ. საკმაოდ ძვირადღირებულ ბიჟუტერიასთან ერთად ოქროები მეწყო, ოქრო ამოურჩევიათ და წაუღიათ. ბიჟუტერია ძირს ეყარა, ფეხით უვლიათ ზემოდან, სულ დაჭეჭყილი იყო“, – გვიყვება დიასახლისი.
მისი თქმით, ოქროსთან ერთად ქურდებმა მისი მეუღლის ტელეფონიც წაიღეს: „აღარ დაგვხდა პლანშეტი, ასევე ჩემი გოგო ფულს აგროვდებდა, 50–დოლარიანი და 20– ლარიანი ჰქონდა შენახული და ისიც მიუგნიათ. პოლიციასთან ერთად რაც დავიანგარიშეთ, 60 ათასი ლარის ზარალი მოგვადგა. თუ დროულად არ ამოიღეს ჩემი მოპარული ნივთები და გაიყიდა, მერე ძიებას რაღა აზრი აქვს“.

შინაგან საქმეთა სამინისტროში აცხადებენ, რომ მომხდარზე ძიება სისხლის სამართლის კოდექსის 177–ე მუხლით დაიწყო, რაც ქურდობას გულისხმობს.

„საგამოძიებო მოქმედებები აქტიურად მიმდინარეობს“, – აცხადებენ შინაგან საქმეთა სამინისტროს საზოგადოებასთან ურთიერთობის სამსახურში.

[თამუნა უჩიძე, ახალციხე]