ერთ კვირაში ახალციხეში სამი სახლი გაქურდეს

რუსთაველის ქუჩაზე N101–ში მცხოვრები ელოიძეები ზღვიდან პირველ აგვისტოს დაბრუნდნენ: „სახლში რომ შემოვედი ყველაფერი გადმოყრილი იყო კარადებიდან. არ ვიცი როდის შემოვიდნენ“, – ამბობს დიასახლისი.

მისი თქმით, სახლიდან 700 ლარამდე თანხა, ასევე, ოქრო წაიღეს.

პირველ აგვისტოს, დღის პირველ ნახვერში გაქურდეს 9 აპრილის ქუჩაზე მცხოვრები ბარამიძეები. ამ პერიოდში შოთა ბარამიძე მეუღლესთან ერთად მაღაზიაში იმყოფებოდა: „ტანსაცმელს ვყიდით. დაახლოებით, 16:20 საათი იქნებოდა, როცა ჩემი მეუღლე სახლში მივიდა, მე მაღაზიაში დავრჩი, დამირეკა ყველაფერი გადმოყრილი დამხვდაო. რაც კი დანაზოგი და ოქრო გვქონდა სულ წაიღეს“.

26 ივლისს ბინა გაქურდეს თამარაშვილის ქუჩაზეც. როგორც შინაგან საქმეთა სამინისტროში ამბობენ, აქედანაც ფული და ოქრო წაიღეს.

ახალციხის რაიონული სამმართველო სამივე ფაქტს სისხლის სამართლის კოდექსის 177–ე მუხლით იძიებს, რაც ქურდობას გულისხმობს და თავისუფლების აღკვეთას 4–დან 7–წლამდე ითვალისწინებს.

[მარიამ ბარძიმაძე, ახალციხე]