ახალციხის საკრებულოს თავმჯდომარის მანქანა “ახალციხის ციხის“ ციტადელზე [Photo]

დღეს, 20 ივლისს, 14:00 საათიდან დაახლოებით 17:00 საათამდე ახალციხის საკრებულოს ბალანსზე რიცხული „ტოიოტას“ მარკის ავტომობილი, „ახალციხის ციხის“ ციტადელზე იდგა. ავტომობილს საკრებულოს თავმჯდომარე დავით ლომიძე მართავდა.

ლომიძე ციტადელზე ეროვნული უმცირესობების ინფორმირებულობის საკითხთან დაკავშირებით გამართულ შეხვედრას ესწრებოდა. მას თან მოადგილე თამარ გოგოლაძე და საკრებულოს სხვა წევრებიც ახლდა.

მარეგულირებელი, ასევე „ახალციხის ციხის“ საზოგადოებასთან ურთიერთობის სამსახურების წარმომადგენლების განცხადებით, ციხის შიდა ტერიტორიაზე ავტომობილების შესვლა დაუშვებელია: „მანქანა მხოლოდ იმ შემთხვევაში შეიძლება გადაადგილდეს თუ რაიმე მძიმე ტვირთი აქვს და მისი გადატანა ხელით შეუძლებლია“.

როგორც "ახალციხის ციხის" საზოგადოებასთან ურთიერთობის სამსახურის წარმომადგენელი ლილი გოზალიშვილი ამბობს, სამთავრობო მანქანებს შესვლა არც უთხოვიათ.

„თამარი (საკრებულოს თავმჯდომარის მოადგილე („ს.კ“) მახლდა თან, ვთხოვეთ და შემოგვიშვეს“, – ასე გვიპასუხა საკრებულოს თავმჯდომარემ დავით ლომიძემ შეკითხვაზე, თუ რატომ იდგა მისი მანქანა აკრძალულ ადგილზე.

მარეგულირებელი სამსახურის წარმომადგენელი სოსო ზაზაძე, რომელმაც სამთავრობო მანქანა აკრძალულ ადგილზე გაატარა, ამბობს, რომ მას ამის შესახებ ამ მანქანაში მსხდომება სთხოვეს: „თამარი ახლდათ თან, დასიცხულია და თუ შეიძლება გაგვატარეო. გადავრეკე–გადმოვრეკე, ნება დამრთეს და შევუშვი“.

შეკითხვაზე, ასეთ დროს სხვა სამთავრობო მანქანებს თუ უშვებენ ციხის შიდა ტერიტორიაზე, ზაზაძემ გვიპასუხა: „მაგას უფროსები წყვეტენ. თუ დაუშვებენ გავატარებთ“.

უფროსს რომელიც ასეთ საკითხებს წყვეტს, „სამხრეთის კარიბჭე“ ვერ შეხვდა, პეტრე ინასარიძე ციხის ტერიტორიაზე ვერ ვნახეთ.

მარეგულირებელი სამსახურის სხვა თანამშრომლებმა კი განაცხადეს, რომ ციხეზე არც სამთავრობო მანქანების გატარება შეიძლება.
სამთავრობო მანქანებს, რომ ციხეზე არ უშვებენ, ამის შესახენ „სამხრეთის კარიბჭესთან“ საზოგადოებასთან ურთიერთობის სამსახურშიც დაგვიდასტურეს: „ამ შემთხვევაში მართლა ქალბატონი თამარი ყოფილა შეუძლოდ და იმიტომ გაუტარებიათ“.

სიცხის გამო ფეხით სიარული რომ არ შეეძლო, სატელეფონო საუბარში „სამხრეთის კარიბჭესთან“ თამარ გოგოლაძემაც განაცხადა. თუმცა, მას რედაქციის შეკითხვა, თუ რატომ იდგა საკრებულოს მანქანა აკრძალულ ადგილზე გაუკვირდა.

„რატომაა დაუშვებელი მანდ მანქანით შესვლა მართლა არ ვიცი. ძალიან ბევრჯერ მინახავს მანდ გამგებლის მანქანაც და სხვების მანქანებიც, მაგრამ არასდროს არ მსმენია თქვენ შეკითხვა დაგესვათ ამაზე. მაინცადამაინც საკრებულოს მანქანაზე გართულება რატომ გაქვთ?!“ – გვითხრა გოგოლაძემ და დაამატა, რომ ციხის ტერიტორიაზე მანქანების შესვლის შეზღუდვასთან დაკავშირებით აცუილბელად დაინტერესდება.











[თამუნა უჩიძე, ახალციხე]