პოლიტიკური ნიშნით გათავისუფლებულმა მწვრთნელმა სასამართლო მოიგო

ფოტო: ”ს.კ.”, 11.07.2012 წ.

ტივაძე საქმიანობას 8 იანვრიდან შეუდგა. ამბობს, რომ ასპინძის სარაგბო გუნდს იმ სახელს დაუბრუნებს, რაც მისი მუშაობის დროს ჰქონდა.

„რადგან ჭაბუკთა გუნდის თითქმის ყველა წევრი თბილისში გადავიდა და იქ ვარჯიშობს, ჩვენ ახალ თაობას მოვამზადებთ, რომლებიც საფესტივალო შეჯიბრებებში მიიღებენ მონაწილეობას“,- განმარტავს თემურ ტივაძე.

შეგახსენებთ, რომ ასპინძის სარაგბო გუნდის „ლომების“ მწვრთნელი სამსახურიდან მას შემდეგ გაათავისუფლეს, რაც „ქართულ ოცნებასთან” ასოცირდა. ტივაძის განცხადებით, ის სამსახურიდან ასპინძის სპორტული ცენტრის დირექტორმა ლევან მაზმიშვილმა, 2012 წლის თებერვალში გაათავისუფლა.

„მიზეზი ის იყო, რომ მხარი დავუჭირე ბიძინა ივანიშვილისთვის საქართველოს მოქალაქეობის მიცემას და ეს ხელმოწერითაც დავადასტურე“, - განმარტავს თემურ ტივაძე.

სამსახურიდან გათავისუფლების შემდეგ ტივაძე ასპინძის სარაგბო ბაზაზე ზედამხედველის ფუნქციას ასრულებდა.

სასამართლო 4 იანვარს ახალციხის რაიონულ სასამართლოში ჩატარდა. მოსამართლის გოჩა ჯეირანაშვილის გადაწყვეტილებით, პოლიტიკური ნიშნით გათავისუფლებულ მწვრთნელს 8 იანვრიდან საქმიანობის გაგრძელების უფლება მიეცა.

დაბა ასპინძის სარაგბო გუნდი ”ლომები” ტივაძემ 1999 წელს ჩამოაყალიბა და 2012 წლის თებერვლამდე სათავეშიც თავად ედგა.

[თინათინ ზაზაძე, ასპინძა]