ახალქალაქში 27 წლის ბიჭის მკვლელობაში ბრალდებულს აღკვეთის ღონისძიებად პატიმრობა შეეფარდა

პროცესი ახალციხის რაიონულ სასამართლოში დღეს, 11 აგვისტოს დისტანციურად გაიმართა.

პროკურორმა, მამუკა ქომოშვილმა ა.გ–ს პატიმრობაში დატოვება მოითხოვა, მისი თქმით, თავისუფლებაზე მყოფმა ბრალდებულმა შეიძლება გამოძიებას ხელი შეუშალოს, ან მიიმალოს.

"ბრალდების მხარე შუამდგომლობს, რომ მის მიმართ გამოყენებული იქნას პატიმრობა, ვინაიდან არსებობს ბრალდებულის მხრიდან მართლმსაჯულების განხორციელების ხელისშეშლის მიზნით, ასევე მტკიცებულებების მოპოვების ხელისშეშლის მიზნით, ახალი დანაშაულის ჩადენის რისკი".

პროკურორის შუამდგომლობას ბრალდებულის პატიმრობაში დატოვებაზე, დაეთანხმნენ დაკავებული ა.გ და მისი ადვოკატი ტარიელ ბალაბანიშვილი. ადვოკატი მიიჩნევს, რომ ბრალდებული სისხლის სამართლის კოდექსით გათვალისწინებული საფუძვლების გამო კი არა, საკუთარი სიცოცხლისა და ჯანმრთელობის დაცვის მიზნით უნდა დარჩეს პატიმრობაში: "ბრალდებულის უსაფრთხოების მიზნით, ამ ეტაპზე, ვეთანხმებით პატიმრობის გამოყენებას აღკვეთის ღონისძიების სახით".

საბოლოოდ, მოსამართლე მარიკა ჩიტაშვილმა გაიზიარა ბრალდების მხარის პოზიცია და 27 წლის ახალგაზრდის მკვლელობაში ბრალდებული ა.გ. პატიმრობაში დატოვა.

სხდომაზე დისტანციურად ჩაერთვნენ პროკურორი მამუკა ქომოშვილი, ბრალდებული და მისი ადვოკატი ტარიელ ბალაბანიშვილი.

ახალქალაქში ახალგაზრდებს შორის დაპირისპირება, სადაც 27 წლის ბიჭი ცეცხლსასროლი იარაღით მოკლეს, რვა აგვისტოს საღამოს მოხდა.

1983 წელს დაბადებული ა.გ. განზრახ მკვლელობისა და ცეცხლსასროლი იარაღის მართლსაწინააღმდეგო შეძენა შენახვა ტარების ბრალდებით დააკავეს. გამოძიება საქართველოს სისხლის სამართლის კოდექსის 108-ე მუხლით და 236 მუხლის III და IV მუხლებით მიმდინარეობს, რაც განზრახ მკვლელობას და იარაღის მართლსაწინააღმდეგო შეძენა შენახვას გულისხმობს.

გულიკამში მცხოვრები ახალგაზრდის გარდაცვალების შემდეგ, სავარაუდოდ მისმა მეგობებმა, ახალქალაქში მკლელობაში ბრალდებულის და მისი ახლობლების სახლები და მანქანები დაწვეს.

საქართველოს პროკურატურის განცხადებით, ცალკე წარმოებად გამოიყო სისხლის სამართლის საქმე ჯგუფური მოქმედების ორგანიზებისა და მასში მონაწილეობის ფაქტზე, რასაც თან ახლავს ძალადობა, რბევა, სხვისი ნივთის განზრახ დაზიანება და განადგურება იარაღის გამოყენებით.

დანაშაული გათვალისწინებულია საქართველოს სისხლის სამართლის კოდექსის 225-ე მუხლის პირველი და მე-2 ნაწილებით.
ორივე სისხლის სამართლის საქმეზე გამოძიება გრძელდება.

მორიგი სასამართლო სხდომა 30 სექტემბერს ჩაინიშნა.

[თაკო ფეიქრიშვილი, ახალციხე]