ახალქალაქში დედა და მისი სამი შვილი გარდაცვლილი ნახეს

მომხდარის შესახებ ინფორმაციას სააგენტო jnews.ge ავრცელებს. სააგენტოს ინფორმაციით, დღეს, 10 ივლისს, შუადღეს, სოფელ ვაჩიანში მეზობლებმა საკუთარ სახლში გარდაცვლილები ნახეს დედა, 37 წლის ქალი და მისი სამი შვილი, 18, 16 და 5 წლის ასაკის (შესაძლოა ასაკში ოდნავი ცდომილება იყოს). jnews-ის ინფორმაციით, ადგილზე მობილიზებული იყო სასწრაფო დახმარების სამსახური. გარდაცვალების მიზეზი უცნობია, გარდაცვლილებს ჯერ ექსპერტიზა უტარდებათ.

როგორც "სამხრეთის კარიბჭეს" სასწრაფო–სამედიცინო დახმარების სამსახურში განუცხადეს, შემთხვევის ადგილზე მისულ სასწრაფო დახმარების ჯგუფს დამწვარი სახლი და სამი გარდაცვლილი დახვდა: დედა და ორი შვილი, გვამები დამწვარი იყო. მათივე ინფორმაციით, მეოთხე გარდაცვლილს ეძებდნენ, თუმცა ვერ ნახეს.

მომხდარს ადასტურებს ახალქალაქის გამგებელი ედუარდ აღასარიანი. როგორც „სამხრეთის კარიბჭესთან“ სატელეფონო საუბარში აცხადებს, ვაჩიანში მომხდარის შესახებ შეიტყვეს, თუმცა, ჯერ დეტალები არ იციან.

მომხდარის შესახებ "სამხრეთის კარიბჭესგან" შეიტყო და შემდეგ დეტალების გადამოწმებას შეეცადა ახალქალაქის გამგეობაში ადმინისტრაციის უფროსი სტეფან ეზოიანი. როგორც მან სოფელში გადაამოწმა, სახლი ნამდვილად დამწვარია: "მაგიდა იყო გადაბრუნებული, ერთი ბავშვი საწოლის ქვეშ ნახესო. გამოძიება მუშაობს და რა მოხდა ზუსტად არავინ იცის".

მისივე თქმით, სახლში მხოლოდ დედა–შვილები ცხოვრობდნენ. ქალის ქმარი რუსეთში, სეზონურ სამუშაოზეა წასული.

საქართველოს შინაგან საქმეთა სამინისტროსგან "სამხრეთის კარიბჭე" მომხდარზე ინფორმაციას თითქმის 1,5 საათია ელოდება. შინაგან საქმეთა სამინისტროში გადაგვამისამართა საგანგბო სიტუაციების სამსახურმაც, რადგან მომხდარი მსხვერპლითაა დასრულებული. როგორც კი უწყებისგან დამატებით დეტალებს შევიტყობთ, გაცნობებთ.

[ნინო ნარიმანიშვილი, თინათინ ზაზაძე, ახალქალაქი]