მესხურ ტერასებზე N6 საჯარო სკოლის და TBC ბანკის თანამშრომლებმა ვაზი დარგეს

მოხალისეებმა „მესხური მწვანეს“ 300–მდე ნერგი ტერასებზე გუშინ, 9 ივლისს დარგეს.

„კომპანია "ვარძიის ტერასები" უდიდეს მადლობას უხდის ყველა მოხალისეს და გულშემატკივარს თანადგომისთვის. ეს დღე სამუდამოდ ჩაიწერება ისტორიაში“, – ამბობს „ვარძიის ტერასების“ დირექტორი გიორგი ნათენაძე.

მისი თქმით, მესხურ ტერასებზე ვაზის დარგვას ახალციხის საპატრულო პოლიციის თანამშრომლებიც გეგმავენ.

მესხურ ტერასებზე ქართველ ებრაელთა მეგობრობის და ჯაყელების საგვარეულო ტერასებიც გაშენდა.

26 ივნისს ჯაყელებმა ხიხვის ჯიშის 120–ზე მეტი ვაზი დარგეს. 2 ივლისს, იგივე ჯიშის ვაზი მესხურ ტერასებზე ისრაელიდან ჩამოსულმა ქართველმა ებრალებმაც დარგეს.

შეგახსენებთ, რეაბილიტირებულ ტერასებზე 17 იშვიათი ჯიშის მესხური ვაზია გაშენებული. „ვარძიის ტერასებს“ მთლიანად 23 ჰექტარი უკავია. ჯამური ინვესტიციის მოცულობა ნახევარ მილიონ ლარამდეა.




[sknews.ge]