ახალციხის მეექვსე სკოლას პრაღის გიმნაზიის მოსწავლეები სტუმრობენ

პრაღის კარლ სლატოვსკის სახელობის გიმნაზიის სტუდენტები ახალციხეში დღეს, 6 ივლისს ჩამოვიდნენ.

„გასულ წელს რაჭაში ვიყავი მეგობრებთან ერთად, საქართველო ძალიან მომეწონა და შემიყვარდა. სულ ვფიქრობდი, როგორ შეიძლებოდა საქართველოში ჩამოსვლა მოსწავლეებთან ერთად, მათთვის ეს სილამაზე რომ მეჩვენებინა. ამიტომ დავწერეთ პროექტი და სწორედ ამ პროექტის ფარგლებში ვიმყოფებით აქ“, – ამბობს გეოგრაფიის მასწავლებელი რადოსლავ კრადკორადიტი.

ჩეხი სტუმრებისთვის ახალციხის მეექვსე საჯარო სკოლაში კონცერტი ჩატარდა. მეთერთმეტე და მეთორმეტე კლასელებმა ქართული ხალხური ცეკვები და სიმღერები შეასრულეს.

„გავიგეთ, რომ სლატკოევის სახელობის გიმნაზიას სურდა დამეგობრება საქართველოს სკოლებთან. გავაგზავნეთ ინფორმაცია ჩვენი სკოლის შესახებ და მოხდა ისე, რომ აგვირჩიეს, რადგან პატარა და წარმატებული სკოლაა. სურვილი აქვთ გაიცნონ საქართველოს ისტორია და კულტურა“, – ამბობს მეექვსე საჯარო სკოლის ბუნების მასწავლებელი მაკა აფრიამაშვილი.

მისი თქმით, სტუმრები ორი დღის განმავლობაში ახალციხეში იქნებიან და მეექვსე სკოლის მოსწავლეების ოჯახებში იცხოვრებენ, შემდეგ კი აჭარას მოინახულებენ.

მეექვსე სკოლამდე ჩეხი სტუმრები ახალციხის მერიაში იმყოფებოდნენ და მერს გიორგი კოპაძეს შეხვდნენ.



[თინათინ ზაზაძე, ახალციხე]