მეექვსე საჯარო სკოლაში ისევ ცივა

მთავარი → საზოგადოება » განათლება 26.11.2014

ახალციხის მეექვსე საჯარო სკოლაში მოსწავლეები და პედაგოგები ელექტროღუმელით კიდევ რამდენიმე დღე გათბებიან, სკოლაში გაზი ამ დრომდე არ შეუყვანიათ.

მეექვსე საჯარო სკოლაში ისევ ელექტროღუმელებით თბებიან. პედაგოგები გაკვეთილებს თითქმის ცარიელ კლასებში ატარებენ, რადგან მოსწავლეების უმეტესობა სკოლაში არ დადის.

სკოლის დირექტორის დროებით მოვალოების შემსრულებელი ეკა დალალიშვილი ამბობს, რომ სკოლაში ბუნებრივ აირს კვირის ბოლოს შეიყვანენ.

„სასწავლო პროცესი შეუფერხებლად მიმდინაროებს, მასწავლებლები გაკვეთილებს ჩვეულებრივად ატარებენ, თუმცა ბავშვების დიდი ნაწილი სკოლაში აღარ დადის. ჩვენ უკვე აღარაფერი ვიცით, ახალციხის რესურსცენტრი აგვარებს ამ პრობლემას და მათივე ინფორმაციით გაზს კვირის ბოლოს შემოგვიყვანენ“, – ამბობს ეკა დალალიშვილი.

შეგახსენებთ, რომ მეექვსე საჯარო სკოლაში ცენტრალური გათბობა სამი წლის წინ დამონტაჟდა. სისტემა შეშაზე მუშაობდა, მიმდინარე წელს კი განათლების სამინისტროს საგანმანათლებლო და სამეცნიერო ინფრასტრუქტურის განვითარების სააგენტომ ცენტრალური გათბობა გაზზე გადაიყვანა და შენობაში გაზის შესაყვანად ტენდერი გამოაცხადა. თუმცა, ტენდერი ჩავარდა.

სააგენტოს გაზის კომპანიასთან ხელშეკრულება 24 ნოემბერს უნდა გაეფორმებინა, რის შემდეგაც 25 ნოემბერს სკოლას გაზი უკვე უნდა ჰქონოდა.

[მანანა სარაშვილი, ახალციხე]