მეექვსე სკოლის მოსწავლეების მედლების საქმეზე ხუთი მასწავლებელი დაკითხეს

დღეს, 27 მარტს, ახალციხის რაიონულ სასამართლოში, მედლების საქმეზე ათი მასწავლებელი უნდა დაეკითხათ. თუმცა, როგორც პროცესზე განმარტეს , მათი ნაწილი ქალაქში არ იყო, სასამართლოს წინაშე ხუთი მასწავლებელი წარსდგა. მათ შორის იმ მოსწალეების კლასის დამრიგებლები, რომლებმაც მედლები ვერ მიიღეს.

მასწავლებლებთან მხარეებს კითხვები ძირითადად ჟურნალის შევსებისას დაშვებულ შეცდომებთან დაკავშირებით ჰქონდათ. პედაგოგებმა უზუსტობები აღიარეს და განაცხადეს, რომ ორივე მოსარჩელე მოსწავლე მედალს იმსახურებდა.

მედლების საქმეში უკვე წარდგენილია წერილობითი მტკიცებულებებიც. შემდეგ სხდომაზე დარჩენილი ხუთ მასწავლებელს დაკითხავენ, რის შემდეგაც მოსამართლე გადაწყვეტილებას მიიღებს.

საქმეზე მომდევნო სხდომა 11 აპრილს, 15:00 საათზე დაინიშნა.

საქმე ეხება მეექვსე საჯარო სკოლის ვერცხლისა და ოქროს მედლებზე წარდგენილ მოსწავლეებს. საკლასო ჟურნალებში გადასწორებული ნიშნების გამო ექვსი მოსწავლიდან ხუთმა მედალი ვერ მიიღო. ამათგან ორი კურსდამთავრებულის მშობელმა სასამართლოს სარჩელით მიმართა და ორი აქტის ბათილად ცნობა მოითხოვა. ერთი არის 14 ნოემბრის, რომლითაც პირველად ეთქვათ უარი ამ მოსწავლეებს ოქროს მედლების კანდიდატებად წარდგენაზე და დეკემბრის, როდესაც განმეორებით მოითხოვა მხარემ მათი წარდგენა, რადგან მოსწავლეების ბრალეულობა არ იკვეთებოდა.

მოსარჩელე მხარე ახალი აქტის გამოცემას ითხოვს, რითაც ამ მოსწავლეებს ხელახლა წარადგენენ ოქროს მედლის კანდიდატებად.

[ლუბა გიორგაძე, ახალციხე]