ახალციხის მეექვსე სკოლის გუნდმა 'ყველაზე მედიაწიგნიერი სკოლის' ტიტული მოიპოვა

მეექვსე საჯარო სკოლის სამოქალაქო განათლების მასწავლებლის, თამარ ჩაფიჩაძის განცხადებით, პროექტს სკოლის დაწყების შემდეგ განახორციელებენ.

„27 სკოლის გუნდს შორის გავედით პირველ ადგილზე, ჩვენი პროექტი შეეხება ყალბი ამბების ამოცნობას და დეზინფორმაციასთან ბრძოლას, ამისთვის ვგეგმავთ ჩავატაროთ ფორტ ბოიარდის მსგავსი თამაში, რომელიც ახალგაზრდებს დაეხმარება ცნობიერების ამაღლებაში მედიაწიგნიერების კუთხით“ – გვითხრა თამარ ჩაფიჩაძემ.

ახალციხის მეექვსე სკოლის გუნდი "რეალითის“ წევრები არიან ამავე სკოლის მასწავლებელი თამარ ჩაფიჩაძე და მეთერთმეტე კლასის მოსწავლეები სალომე ტაბატაძე, საბა გელაშვილი, გიორგი გეწაძე, მათე ნებაძე.

„კონკურსის შესახებ მასწავლებელმა შეგვატყობინა, დაახლოებით ორი კვირა დაგვჭირდა იმისთვის, რომ იდეა მოგვეფიქრებინა და აპლიკაცია შეგვევსო. ჟიურთან წარვადგინეთ ჩვენი პროექტი, მოეწონათ და დღეს დაგვაჯილდოვეს“, – ამბობს მეექვსე საჯარო სკოლის მეთერთმეტე კლასის მოსწავლე სალი ტაბატაძე.

ყველაზე მედიაწიგნიერი სკოლის გამოსავლენად, მედიის განვითარების ფონდი კონკურსს ნიდერალნდების საელჩოს მხარდაჭერით და ილიას უნივერსიტეტთან და PHI საქართველოსთან პარტნიორობით ატარებს.



[რობი ზარიძე]