სამცხე–ჯავახეთის საპატრულო პოლიციის მაღალჩინოსანს თანამდებობა დაატოვებინეს

შინაგან საქმეთა სამინისტრომ სამცხე–ჯავახეთის საპატრულო პოლიციის უფროსის მოადგილე არჩილ ბაცანაძე კადრების განკარგულებაში გადაიყვანა. არის თუ არა ბაცანაძის თანამდებობიდან გათავისუფლების მიზეზი მის მიერ მომხდარი ავტოსაგზაო შემთხვევა, სამინისტროში არ საუბრობენ.

შეგახსენებთ, რომ არჩილ ბაცანაძე სამსახურეობრივი მანქანით, შავი ფერის „შკოდა“ სერიით AF–682-FA, BMW-ს მარკის ავტომობილს 13 მარტს, ღამით გორში, ცენტრალურ მაგისტრალზე შეეჯახა. აღნიშნულ ინფორმაციას „სამხრეთის კარიბჭე“ საკუთარ წყაროებზე დაყრდნობით ავრცელებდა. შსს ავარიის ფაქტს ადასტურებდა, თუმცა, მძღოლის ვინაობას არ ამჟღავნებდა. რედაქცია, ამავე მასალაში დამტვრეული მანქანების ფოტოებსაც ავრცელებდა.

მოგვიანებით, შსს–მ „სამხრეთის კარიბჭეს“ მიერ გავრცელებული ინფორმაცია დაადასტურა. მას სამი წლით მართვის მოწმობა ჩამოართვეს და სასტიკი საყვედური გამოუცხადეს.

არჩილ ბაცანაძე საპატრულო პოლიციის სამცხე–ჯავახეთის მთავარი სამმართველოს უფროსის მოადგილედ 2015 წლის შემოდგომით დაინიშნა, მას შემდეგ, რაც სამმართველოს უფროსის პოსტი გიორგი ნასყიდაშვილმა დაიკავა.

[თამუნა უჩიძე, ახალციხე]