ავარია გორში – რა კავშირი აქვს მომხდართან სამცხე–ჯავახეთის საპატრულო პოლიციის მაღალჩინოსანს

არჩილ ბაცანაძე სამსახურეობრივი მოვალეობის შესრულების დროს. ფოტო:sknews.ge. 01/04/2016წ.

ავტოსაგზაო შემთხვევა, რომლის ერთ–ერთი მონაწილე, „სამხრეთის კარიბჭეს“ კონფიდენციალური და სანდო წყაროს ინფორმაციით, საპატრულო პოლიციის სამცხე–ჯავახეთის მთავარი სამმართველოს უფროსის მოადგილე, არჩილ ბაცანაძე იყო, 2016 წლის 13 მარტს, ღამით მოხდა.

სამმართველოს ავტომანქანა, შავი ფერის „შკოდა“ სერიით AF–682-FA, რომელიც არჩილ ბაცანაძეს ემსახურება, BMW-ს მარკის ავტომობილს შეეჯახა. წყაროს ინფორმაციით, BMW-ს მარკის ავტომობილში ცოლ–ქმარი ისხდნენ და მათ მსუბუქი დაზიანებები მიიღეს.

შინაგან საქმეთა სამინისტროში, 13 მარტს გორში მომხდარ ავტოსაგზაო შემთხვევას ადასტურებენ და აცხადებენ, რომ ავარიის შედეგად არავინ დაშავებულა. მათივე განმარტებით, ძიება ადმინისტრაციულ სამართალდარღვევათა კოდექსის 116–ე მუხლის მეშვიდე ნაწილით მიმდინარეობს. ეს მუხლი გულისხმობს სატრანსპორტო საშუალების მართვას ალკოჰოლური, ნარკოტიკული, ან ფსიქოტროპული სიმთვრალის მდგომარეობაში, ანდა სატრანსპორტო საშუალების სამართავად გადაცემას ასეთ მდგომარეობაში მყოფი პირისათვის.

ამავე მუხლის მე–7 ნაწილში კი ვკითხულობთ: „სამართალდარღვევები, რომლებსაც მოჰყვა სატრანსპორტო საშუალების, ტვირთის, გზის, საგზაო თუ სხვა ნაგებობის, აგრეთვე სხვა ქონების ან ადამიანის სხეულის მსუბუქი დაზიანება, – გამოიწვევს სატრანსპორტო საშუალების მართვის უფლების ჩამორთმევას 3 წლის ვადით და დაჯარიმებას 1000 ლარის ოდენობით“.

„სამხრეთის კარიბჭეს“ წყაროს ინფორმაციით, შსს–ს კუთვნილ მანქანას, რომელიც „ბე–ემ–ვეს“ დაეჯახა, ნასვამ მადგომარეობაში მყოფი არჩილ ბაცანაძე მართავდა. მან ახალციხეში, ერთ–ერთი ადგილობრივის დაბადების დღეზე იქეიფა და თბილისში მიდიოდა.

შინაგან საქმეთა სამინისტროს საზოგადოებასთან ურთიერთობის სამსახურში ამ ფაქტს, არც უარყოფენ და არც ადასტრურებენ: „ამაზე კომენტარს ვერ გავაკეთებთ, რადგან მძღოლის ვინაობა პერსონალურია. ასევე,პერსონალურია ინფორმაცია იმის შესახებ, აქვს თუ არა მართვის უფლება ამა თუ იმ პირს“.

შსს–ს სამსახურეობრივი „შკოდა“ მარტში საპატრულო პოლიციის დეპარტამენტის სამცხე-ჯავახეთის მთავარი სამმართველოს პარკინგზე არ ჩანდა. შეკეთებული მანქანა ამ დროისთვის კვლავ შსს–ს ემსახურება.

„მუხლი რომლითაც ძიებაა დაწყებული, ნივთის დაზიანებას გულისხმობს, მაგრამ რადგან მანქანა უკვე გაკეთებულია, შესაძლოა ამ ადამიანს სამსახურში დისციპლინური პასუხისმგებლობა არ დაეკისროს“, – ამბობს ახალგაზრდა იურისტთა ასოციაციის იურისტი გოგა ხატიაშვილი.

მისივე განმარტებით, სამართალდარღვევათა კოდექსის 116–ე მუხლით ძიების დაწყება ავტომატურად მართვის უფლების ჩამორთმევას არ გულისხმობს: „შესაძლოა ჯერ დანიშნული ექსპერტიზების პასუხებს ელოდებოდნენ“.

მომხდარს სააპტრულო პოლიციის შიდა ქართლის დეპარტამენტი იძიებს.

არჩილ ბაცანაძე საპატრულო პოლიციის სამცხე–ჯავახეთის მთავარი სამმართველოს უფროსის მოადგილედ 2015 წლის შემოდგომით დაინიშნა, მას შემდეგ, რაც სამმართველოს უფროსის პოსტი გიორგი ნასყიდაშვილმა დაიკავა. ამ ეტაპზე ბაცანაძე მუშაობას ჩვეულებრივად აგრძელებს.


BMW-ს მარკის ავტომობილი


სამმართველოს კუთვნილი ავტომობილი

[თამუნა უჩიძე, ახალციხე]