ახალციხის მერი საპატრულო პოლიციის უფროსის შეცვლაზე

გუშინ, 5 ოქტომბერს, ახალციხის მერისა და სამოქალაქო საზოგადოების შეხვედრისას, რომელიც ახალციხის დემოკრატიული ჩართულობის ცენტრში გაიმართა, შეკითხვები ტრანსპორტით გადატვრთულ ქუჩებსა და საპატრულო პოლიციის მიერ დაწერილ ჯარიმებსაც შეეხო.

როგორც მერმა შეხვედრაზე განაცხადა, ჯარიმა ხაშურთან მასაც დაუწერეს: „ასეთ შემთხვევაში გამოსავალი ერთია, უნდა მიმართო სასამართლოს, ამ ჯარიმას გავასაჩივრებ, უკანონოდ დამიწერეს და სხვა გზა არ მაქვს. ახალციხეში ასე ბევრმა გაასაჩივრა და საპატრულო პოლიციას არა ერთი პროცესი მოუგეს. ამის მერე შედარებით ცოტა შერბილდნენ“.

როგორც კოპაძემ შეხვედრაზე თქვა, ახალციხეში უკანონოდ დაწერილი ჯარიმებისა და საპატრულო პოლიციის თანამშრომლების მიერ განხორციელებული არასწორი ქმედებების შესახებ მან შესაბამის პირებთან, მათ შორის შინაგან საქმეთა მინისტრთანაც ისაუბრა: „პირველი უფროსი გაათავისუფლეს, მეორეც ახლა გაუშვეს. არ ვიცი ამის გამო გაათავისუფლეს თუ არა, მაგრამ ფაქტია, რომ გაუშვეს“.

შეგახსენებთ, საპატრულო პოლიციის სამცხე–ჯავახეთის მთავარი სამმართველოს უფროსი დავით მაღრაძე 3 ოქტომბერს გიორგი ნასყიდაშვილმა ჩაანაცვლა, მანამდე კი მაღრაძის წინამორბედი ზაალ ფუტკარაძე სამცხე–ჯავახეთიდან იმერეთში გადაიყვანეს.

[თამუნა უჩიძე, ახალციხე]