სამცხე–ჯავახეთის საპატრულო პოლიციის მაღალჩინოსანს მართვის უფლება ჩამოერთვა

სამცხე–ჯავახეთის საპატრულო პოლიციის უფროსის მოადგილეს არჩილ ბაცანაძეს ადმინისტრაციული და დისციპლინური სახდელი სამსახურეობრივი მანქანით, ქალაქ გორში მომხდარი ავტოსაგზაო შემთხვევის გამო დააკისრეს.

შინაგან საქმეთა სამინისტროში აცხადებენ, რომ ბაცანაძეზე ოქმი ადმინისტრაციულ სამართალდარღვევათა კოდექსის 116–ე მუხლის მე–7 ნაწილის მიხედვით შედგა.

ეს მუხლი გულისხმობს სატრანსპორტო საშუალების მართვას ალკოჰოლური, ნარკოტიკული, ან ფსიქოტროპული სიმთვრალის მდგომარეობაში, ანდა სატრანსპორტო საშუალების სამართავად გადაცემას ასეთ მდგომარეობაში მყოფი პირისათვის.

116–ე მუხლის მე–7 ნაწილში კი ვკითხულობთ: „სამართალდარღვევები, რომლებსაც მოჰყვა სატრანსპორტო საშუალების, ტვირთის, გზის, საგზაო თუ სხვა ნაგებობის, აგრეთვე სხვა ქონების ან ადამიანის სხეულის მსუბუქი დაზიანება, – გამოიწვევს სატრანსპორტო საშუალების მართვის უფლების ჩამორთმევას 3 წლის ვადით და დაჯარიმებას 1000 ლარის ოდენობით“.

„ამ პიროვნებას სამი წლით მანქანის მართვის უფლება ჩამოერთვა, ასევე პირად საქმეში სასტიკი საყვედური გამოუცხადეს“, – ამბობს „სამხრეთის კარიბჭესთან“ შინაგან საქმეთა სამინისტროს საზოგადოებასთან ურთიერთობის სამსახურის წარმომადგენელი.

მისი თქმით, ბაცანაძე მუშაობას ჩვეულებრივ აგრძელებს: „სასტიკი საყვედური ნებისმიერს შეიძლება გამოუცხადონ, თუ რაიმეს დააშავებს“.

შეგახსენებთ, არჩილ ბაცანაძე სამსახურეობრივი მანქანით, შავი ფერის „შკოდა“ სერიით AF–682-FA, BMW-ს მარკის ავტომობილს 13 მარტს, ღამით გორში, ცენტრალურ მაგისტრალზე შეეჯახა. აღნიშნულ ინფორმაციას „სამხრეთის კარიბჭე“ საკუთარ წყაროებზე დაყრდნობით ავრცელებდა. შსს ავარიის ფაქტს ადასტურებდა, თუმცა, მძღოლის ვინაობას არ ამჟღავნებდა. რედაქცია, ამავე მასალაში დამტვრეული მანქანების ფოტოებსაც ავრცელებდა.

არჩილ ბაცანაძე საპატრულო პოლიციის სამცხე–ჯავახეთის მთავარი სამმართველოს უფროსის მოადგილედ 2015 წლის შემოდგომით დაინიშნა, მას შემდეგ, რაც სამმართველოს უფროსის პოსტი გიორგი ნასყიდაშვილმა დაიკავა.

[თამუნა უჩიძე, ახალციხე]