ახალციხის მერიამ უმცირესობის დეპუტატის საქმეზე გადაწყვეტილება გაასაჩივრა

ახალციხის მერიამ თბილისის სააპელაციო სასამართლოში ახალციხის რაიონული მოსამართლის გია ბერაიას გადაწვეტილება უკვე გაასაჩივრა.

„არ ვეთანხმებოდით და იმიტომ გავასაჩივრეთ“, – ამბობს გიორგი კოპაძის ადვოკატი დავით მუმლაძე.

მეორე მხარეს ჯერ სააპელაციო სასამართლოს საჩივარი არ ჩაბარებია, შესაბამსიად არც შესაგებელია მომზადებული.

„ვფიქრობ, რომ სააპელაციო ახალციხის რაიონული სასამართლოს გადაწყვეტილებას ძალაში დატოვებს. თუმცა შესაძლოა, წარმოებაში ეს საქმე არ მიიღოს“, – ამბობს უმცირესობის დეპუტატის ჯიმშერ გოგოლაურის ადვოკატი მზია გიორგაძე და ამატებს, რომ ამას მერია მხოლოდ დროის გაყვანის მზინით აკეთებს – „თავად იციან, რომ ახალციხის რაიონული სასამართლოს დასაბუთებული გადაწყვეტილება არ შეიცვლება“.

შეგახსენებთ, მოსამართლის გადაწყვეტილებით, გიორგი კოპაძემ ტელეკომპანია „მეცხრე არხის“ გადაცემა „დიალოგში“ ჯიმშერ გოგოლაურზე გაკეთებული ცილისმწამებლური განცხადება უნდა უარყოს. სწორედ ამ გადაცემაში უთხრა გიორგი კოპაძემ დეპუტატ ჯიმშერ გოგოლაურს, რომ „მაშინ როცა იგი პოლიციის თანამშრომელი იყო, პატიმრებს ბოთლებზე სვამდა და პატიმრები ამის გამო ფანჯრებიდან ხტებოდნენ“.

აღნიშნული გადაწყვეტილება გია ბერაიამ მიმდინარე წლის 23 მარტს გამოაცხადა.

[თამუნა უჩიძე, ახალციხე]