უარყო თუ არა ცილისმწამებლური განცხადება გიორგი კოპაძემ

სამი ინსტანციის სასამართლო გადაწყვეტილების აღსასრულებლად გიორგი კოპაძე ტელეკომპანია "მეცხრე არხის" თოქ–შოუში დღეს, 26 ივლისს მივიდა.

გიორგი კოპაძის განმარტებით, იგი არ ეთანხმება იმ აზრს, რომ ორი წლის წინ, "მეცხე არხის" ეთერში, ჯიმშერ გოგოლაურის მიმართ ცილისმწამებლური განცხადებები გააკეთა, თუმცა სასამართლოს გადაწყვეტილების აღსასრულებლად ტელევიზიაში მივიდა.

"მე ნამდვილად არა ვარ ჩემი სურვილით მოსული, მე მხოლოდ აღვასრულებ სასამართლო გადაწყვეტილებას.მე დამევალა ჯიმშერ გოგოლაურის მიმართ ცილისმწამებლური განცხადების უარყოფა შემდეგი სახით, რასაც აღვასრულებ. 2015 წლის 10 დეკემბერს, გადაცემა "დიალოგის" პირდაპირ ეთერში, ჯიმშერ გოგოლაურის მიმართ გავრცელებული ინფორმაცია, "პატიმრები რომლებსაც, შენ ბოთლზე სვამდი და ფანჯრიდან აგდებდი, რის გამოც პოლიციიდან გამოგაგდეს" მიჩნეულ იქნა ცილისწამებად, ჯიმშერ გოგოლაურის პატივის და ღირსების, ასევე საქმიანი რეპუტაციის შემლახავ განცხადებად",–ამოიკითხა გიორგი კოპაძემ "დიალოგის" პირდაპირ ეთერში.

გადაცემის წამყვანის კითხვას, გიორგი კოპაძე თავად ეთანხმებოდა თუ არა სასამართლო გადაწყვეტილებას? მან უპასუხა, რომ არ ეთანხმებოდა.

დეპუტატი ტელევიზიაში "ქართული ოცნების" რაიონული ორგანიზაციის წევრებთან და დეპუტატის ბიუროს წარმომადგენლებთან ერთად მივიდა, განცხადების შემდეგ კი ტელევიზია მალევე დატოვა.

ახალციხის საკრებულოს ყოფილი დეპუტატი ჯიმშერ გოგოლაური კი ტელეკომპანია "მეცხრე არხში" იმყოფებოდა, თუმცა იგი საეთერო სტუდიაში არ შესულა. გოგოლაური, გიორგი კოპაძის მხრიდან ტელევიზიით გამოსვლას, სამი ინსტანციის გადაწყვეტილების აღსრულებად არ მიიჩნევს და აღსრულების ეროვნული ბიუროსათვის ხელახლა მიმართვას აპირებს.

"მან ჩაიკითხა სასამართლო გადაწყვეტილება, მაგრამ სიტყვა მე ამ ფაქტს ვუარვყოფო არ უთქვამს. ანუ სასამართლო გადაწყვეტილება არ აღასრულა და მოუწევს მაინც ამის აღსრულება, მივმართავ კანონიერ მეთოდებს",–განაცხადა ჯიმშერ გოგოლაურმა.

შეგახსენებთ, რომ პარლამენტის წევრს გიორგი კოპაძესა და ქალაქ ახალციხის საკრებულოს ყოფილ დეპუტატს ჯიმშერ გოგოლაურს შორის დაპირისპირება 2015 წლის 10 დეკემბერს დაიწყო. ახალციხის ტელეკომპანია "მე–9 არხის" გადაცემა "დიალოგში", პირდაპირ ეთერში, ახალციხის 2016 წლის ბიუჯეტის პროექტის განხილვის დროს, გიორგი კოპაძემ გოგოლაურს ბრალი დასდო, რომ პოლიციაში მუშაობის დროს, პატიმრების უფლებებს არღვევდა. ცილისწამებისთვის გოგოლაურმა კოპაძეს უჩივლა და მას სამივე ინსტანცია მოუგო.

მიუხედავად ამისა, გიორგი კოპაძე ცილისწამების უარყოფას არ აპირებდა ამიტომ, გოგოლაურმა აღსრულების ეროვნულ ბიუროს მიმართა. გადაწყვეტილება იმის, შესახებ, რომ კოპაძემ ორი წლის წინ, გოგოლაურის მიმართ გაკეთებული ცილისმწამებლური განცხადებები უნდა უარყოს, ცნობილი გასულ კვირას გახდა.

ჯიმშერ გოგოლაურს სასარჩელო მოთხოვნაში, გიორგი კოპაძის მხრიდან ბოდიშის მოხდის მოთხოვნა, "მეცხრე არხთან" ერთად "სამხრეთის კარიბჭეს" ეთერიდანაც ჰქონდა, თუმცა სასამართლომ ეს ნაწილი არ დაუკმაყოფილა და მხოლოდ ის მედიასაშუალება დატოვა, სადაც კოპაძემ, გოგოლაურის მიმართ ცილისმწამებლური განცხადება გააკეთა.



[ლუბა გიორგაძე, ახალციხე]