ხვალ დეპუტატი გიორგი კოპაძე ჯიმშერ გოგოლაურის მიმართ ცილისწამებას უარყოფს

დეპუტატ გიორგი კოპაძისათვის სატელევიზიო ეთერის დათმობის შესახებ აღსრულების ეროვნული ბიურო და ტელეკომპანია "მეცხრე არხი" შეთანხმდნენ. პირდაპირი ეთერი ხვალ, 20:30 საათზე დაიწყება.

როგორც აღსრულების ეროვნულ ბიუროში განმარტავენ, სასამართლო გადაწყვეტილებაში მხოლოდ დეპუტატის ცილისწამების უარყოფა იყო მითითებული, შესაბამისად, სატელევიზიო ეთერის დროს, საეთერო სტუდიაში, მეორე მხარის, ჯიმშერ გოგოლაურის დასწრება საჭირო არ არის.

"ასეთია სასამართლო გადაწყვეტილება და შესაბამისად, ამას აღვასრულებთ ჩვენც. სტუდიაში სხვა პირების დასწრების აუცილებლობა არ არის",– განმარტავენ აღსრულების ერივნულ ბიუროში.

იმ ფაქტს, რომ საეთერო სტუდიში მისი დასწრების აუცილებლობა არ დგას, ჯიმშერ გოგოლაური კატეგორიულად ეწინააღმდეგება და "სამხრეთის კარიბჭესთან" აცხადებს, რომ ეთერის დროს ტელევიზიაში აუცილებლად მივა.

"ძალიან სასაცილოა, რომ ჩემი დასწრება არ შეიძლება. არ აწყობთ, რადგან იციან კოპაძეს თავზე დავამხობ ყველაფერს. მე მიხდის ბოდიშს და აბა ვინ უნდა ესწრებოდეს ეთერს?!", – ამბობს ჯიმშერ გოგოლაური.

შეგახსენებთ, რომ პარლამენტის წევრს გიორგი კოპაძესა და ქალაქ ახალციხის საკრებულოს ყოფილ დეპუტატს ჯიმშერ გოგოლაურს შორის დაპირისპირება 2015 წლის 10 დეკემბერს დაიწყო. ახალციხის ტელეკომპანია "მე–9 არხის" გადაცემა "დიალოგში", პირდაპირ ეთერში, ახალციხის 2016 წლის ბიუჯეტის პროექტის განხილვის დროს, გიორგი კოპაძემ გოგოლაურს ბრალი დასდო, რომ პოლიციაში მუშაობის დროს, პატიმრების უფლებებს არღვევდა. ცილისწამებისთვის გოგოლაურმა კოპაძეს უჩივლა და მას სამივე ინსტანცია მოუგო.

მიუხედავად ამისა, გიორგი კოპაძე ცილისწამების უარყოფას არ აპირებდა ამიტომ, გოგოლაურმა აღსრულების ეროვნულ ბიუროს მიმართა. გადაწყვეტილება იმის, შესახებ, რომ კოპაძემ ორი წლის წინ, გოგოლაურის მიმართ გაკეთებული ცილისმწამებლური განცხადებები უნდა უარყოს, ცნობილი გასულ კვირას გახდა.

ჯიმშერ გოგოლაურს სასარჩელო მოთხოვნაში, გიორგი კოპაძის მხრიდან ბოდიშის მოხდის მოთხოვნა, "მეცხრე არხთან" ერთად "სამხრეთის კარიბჭეს" ეთერიდანაც ჰქონდა, თუმცა სასამართლომ ეს ნაწილი არ დაუკმაყოფილა და მხოლოდ ის მედიასაშუალება დატოვა, სადაც კოპაძემ, გოგოლაურის მიმართ ცილისმწამებლური განცხადება გააკეთა.

[ლუბა გიორგაძე, ახალციხე]